Ministria e Brendshme ka dhënë detaje në lidhje me grabitjen spektakolare që ndodhi mëngjesin e së dielës në muzeun e Luvrit.
Sipas ministrisë, rreth orës 09:30 sipas orës lokale disa persona hynë në Galerinë Apollo nëpërmjet një dritareje, të cilën e thyen.
Hajdutët që mendohet të jenë tre ose katër përdorën një vinç mallrash në një kamion jashtë ndërtesës.
Pasi hynë brenda, hajdutët vodhën nëntë objekte nga koleksioni i bizhuterive të Napoleonit dhe Perandoreshës, përfshirë një gjerdan, një karficë dhe një kurorë.
Burime brenda muzeut konfirmojnë se diamanti legjendar “Régent”, më i madhi i koleksionit me peshë mbi 140 karatë, nuk është prekur nga grabitja.
Ministri Nunez thotë se grabitja zgjati shtatë minuta, ndërkohë që po hartohet një listë e saktë e asaj që është vjedhur.
Përtej vlerës së tyre tregtare, ministria thotë se sendet e vjedhura kanë një vlerë të pallogaritshme historike dhe kulturore.
Turistët përshkruan skena konfuzioni dhe paniku gjatë evakuimit të muzeut. Një vizitor nga Britania tregoi për The Sun: “Radhët ishin të gjata kur na thanë se muzeu do të mbyllej sepse dikush kishte tentuar të vidhte diçka brenda. Më pas erdhën forca policore dhe nisi evakuimi. Ishte kaos, por disa njerëz vazhdonin të bënin selfie ndërsa policia i largonte. Ishte një prani e madhe ushtarake dhe policore.”
Një tjetër vizitor britanik shtoi: “Ngjarja ishte si skenë nga filmi The Da Vinci Code. Ishte emocionuese dhe plot mister, edhe pse na zhgënjeu që nuk mundëm të hynim. Sirenat ishin me zë të lartë për rreth 30 minuta dhe askush nuk e dinte se çfarë po ndodhte.”
Hetimet po vazhdojnë për të zbuluar se si grabitësit hynë në një nga vendet më të sigurta kulturore në Evropë. Muzeu i Luvrit është simbol global i kulturës franceze dhe strehon kryevepra të njohura si Mona Lisa dhe Venera e Milos.
Me rreth 8 deri në 9 milionë vizitorë në vit dhe mbi 380,000 objekte në koleksion, Luvri konsiderohet një nga muzeumet më të ruajtura në botë, me vlerë që arrin miliarda paund.
Grabitja e fundit në Luvër nuk është e vetmja në historinë e Parisit. Në vitin 1911, Mona Lisa u vodh nga një punonjës i muzeut dhe u rikthye vetëm dy vjet më vonë.
Në nëntor 2024, grabitës me sëpatë vodhën nga Musée Cognacq-Jay shtatë kuti të rralla, ndërsa në 2010 humbën pesë kryevepra nga Picasso dhe Matisse në Muzeun e Artit Modern në Paris. Pesë grabitësit u dënuan me burgim në 2017.
Ministrja e Kulturës e Francës, Rachida Dati, tha në X: “Një grabitje ka ndodhur këtë mëngjes në hapjen e @MuseeLouvre. Nuk ka lëndime për t’u raportuar. Jam në vendngjarje së bashku me ekipet e muzeut dhe policinë. Hetimet po vazhdojnë.”
Ngjarja e fundit tregon se edhe muzeumet më të sigurta janë të prekshme ndaj krimit të organizuar, duke ngritur pyetje serioze mbi sigurinë e thesareve kulturore në botë.