Policia e Shkodrës ka goditur një tjetër rast të aktivitetit të paligjshëm të prostitucionit këtë të enjte, më 27 nëntor, duke finalizuar operacionin e koduar “Rent House 2”. Operacioni u zhvillua nga Sektori për Hetimin e Narkotikëve, në bashkëpunim me Komisariatin e Policisë Shkodër dhe Seksionin e Mbështetjes Operacionale, pas informacioneve operative që çuan në identifikimin e një apartamenti ku dyshohej se zhvillohej aktiviteti i kundërligjshëm.
Gjatë kontrollit në një apartament në lagjen “Parrucë” të qytetit verior, policia gjeti dhe arrestoi 3 persona, të kapur në flagrancë brenda ambienteve ku ushtrohej prostitucioni. Të arrestuarat janë dy shtetase me origjinë kineze, Sh. J., 34 vjeçe, dhe Y. P., 46 vjeçe, të cilat kishin marrë apartamentin me qira dhe e kishin përshtatur posaçërisht për ushtrimin e prostitucionit. Në pranga ra edhe E. K., 37 vjeç, banues në Shkodër, i dyshuar për përfshirje në këtë aktivitet të paligjshëm.
Gjatë operacionit u sekuestrua një shumë parash, e dyshuar si e përfituar nga prostitucioni, si dhe 5 telefona celularë që dyshohet se përdoreshin për komunikimin me klientët.
Policia vijon punën për dokumentimin e plotë të rastit dhe identifikimin e personave të tjerë që mund të jenë të përfshirë në këtë rrjet.