Raporti i OSBE/ODIHR-it për zgjedhjet e 11 majit sipas zëvendëskryetarit të KRIIK, Dritan Taulla, është paradoksal, pasi në një anë evidenton përmirësime në ligj, nga ana tjetër ngre problematika serioze.
Për RTSH, z. Taulla thekson se gjetjet flasin për demokraci me fasadë të mirë, ndërsa integriteti i zgjedhjeve ende mungon.
“Në vetvete, Kodi i ri Zgjedhor garanton zgjedhje me integritet dhe standarde, por ama duhet të zbatohet në mënyrën e duhur. Evidenton edhe shumë momente kur nuk është zbatuar në mënyrën e duhur, përfshirë edhe faktin që Komisioni i Ankesave dhe Sanksioneve e pa ligjin shumë ngushtë kur erdhi puna te përdorimi i burimeve shtetërore. Dokumenti i Kopenhagës, specifikisht paragrafi 5.4 thotë që duhet që partitë politike të jenë të ndara nga shteti. Ne të Europës Lindore, përfshirë edhe shqiptarët, e dimë se ç’do të thotë kur partia dhe shteti janë një. Kjo është shumë shqetësuese, sepse na tregon që po kthehemi mbrapa, ku kemi një parti politike e cila e ka njësuar pushtetin me partinë e vet. Kjo, praktikisht, çon në asfiksim të demokracisë,” thotë z. Taulla.
Sipas tij, për vite me radhë nuk ka përparim për shkak se palët politike nuk kanë vullnet për reformë të thelluar.
“Klasa politike duhet të gjejë vullnetin që të bëjë një reformë të mirëfilltë, që kuadri ligjor të garantojë zgjedhje me integritet. Sigurisht që duhet edhe implementimi i ligjit. Nuk mjafton vetëm ligji në vetvete. Pa një implementim të mirëfilltë ai është i vdekur. Edhe këtë e nxjerr raporti i ODIHR-it. Ajo që duhet bërë, nga ana tjetër, nga shoqëria civile, nga organizatat qytetare, nga qytetarët, është që të ushtrojnë presion mbi të zgjedhurit, që të garantojnë një kuadër ligjor për zgjedhje me integritet. Nëse në vijim raporti i ODIHR-it ka thënë që nuk është bërë reforma, nuk janë marrë në konsideratë rekomandimet tona, nuk ka amendime ligjore, kësaj radhe shkon një hap më tutje: nuk është bërë reformë dhe kjo tregon mungesë vullneti politik,” shprehet zv.kryetari i KRIIK.