Presidenti amerikan, Donald Trump dhe presidenti rus, Vladimir Putin, kanë rënë dakord të zhvillojnë një takim në ditët në vijim. Lajmi është konfirmuar nga një këshilltar i Kremlinit, ndërsa përpjekjet për t’i dhënë fund luftës në Ukrainë po intensifikohen.
Ndihmësi i Putin, Yury Ushakov tha sot, më 7 gusht, se është e vështirë të përcaktohet se sa do të zgjasin përgatitjet, por si pikë referimi është dakordësuar që takimi të mbahet javën e kaluar. Po ashtu bëri me dije se edhe vendi i takimit është përcaktuar, por nuk ka zbuluar detaje.
“Sipas propozimit të palës amerikane, është arritur në parim një marrëveshje për të zhvilluar një takim dypalësh në nivelin më të lartë në ditët në vijim, pra një takim mes presidentit Vladimir Putin dhe Donald Trump”, tha ai për mediat ruse.
Deklarata vjen pasi Trump tha më herët se kishte “një mundësi të mirë” për të zhvilluar një takim të drejtpërdrejtë me liderët e Rusisë dhe Ukrainës “shumë shpejt”, për të diskutuar një marrëveshje paqeje.
Gjatë një konference për shtyp në Shtëpinë e Bardhë të mërkurën në mbrëmje, Trump u pyet nëse presidenti ukrainas Volodymyr Zelensky dhe Vladimir Putin kishin rënë dakord për një samit trepalësh. Ai u përgjigj se ekzistonte “një perspektivë shumë e mirë”, pa dhënë më shumë detaje.
Por në reagimin e Ushakov, duket se kjo ide është rrëzuar nga pala ruse.
“Propozojmë, para së gjithash, të fokusohemi në përgatitjen e një takimi dypalësh me Trump-in dhe e konsiderojmë jashtëzakonisht të rëndësishme që ky takim të jetë i suksesshëm dhe produktiv”, theksoi ndihmësi i Putin.
Komentet e presidentit amerikan erdhën pasi i dërguari i tij, Steve Witkoff, zhvilloi bisedime në Moskë me presidentin Putin, të cilat Trump i përshkroi si “shumë produktive”. Nga ana e saj, Kremlini publikoi një deklaratë të shkurtër, duke i cilësuar bisedimet “konstruktive” dhe duke theksuar se palët kishin shkëmbyer “sinjale”.
Ndërsa sot, Ushakov shtoi se në takimin mes Putin-it dhe Wittkoff u diskutua për “vazhdimin e punës së përbashkët për zgjidhjen e krizës në Ukrainë dhe se Rusia po informon miqtë dhe partnerët e saj mbi rezultatet e këtij takimi”.
Witkoff ka udhëtuar në Moskë katër herë që nga fillimi i vitit dhe pas çdo vizite, Trump ka shprehur optimizëm për një armëpushim të mundshëm. Megjithatë, muajin e kaluar, ai pranoi për BBC se në të katër rastet, Putin e kishte zhgënjyer.
Pavarësisht kësaj, presidenti amerikan tani po mban një ton më të matur, duke deklaruar: “Nuk e quaj një përparim… kemi kohë që punojmë për këtë. Janë mijëra të rinj që po vdesin… Unë jam këtu për t’i dhënë fund kësaj lufte”.
Kujtojmë se të premten skadon afati i vendosur nga Trump për Rusinë që të pranojë një armëpushim në Ukrainë përpara se të përballet me sanksione më të rënda.