Sekretari amerikan i Shtetit, Marco Rubio, e cilësoi si “të papranueshme, të trishtueshme dhe të rrezikshme” hyrjen e dronëve rusë në territorin e Polonisë.
“Çështja është nëse dronët kishin një objektiv të caktuar duke hyrë në Poloni. Nëse kjo rezulton e vërtetë, atëherë kemi të bëjmë me një përshkallëzim serioz”, u shpreh Rubio për gazetarët gjatë nisjes së tij për në Britani dhe Izrael.
Ai shtoi gjithashtu se do të duhen edhe “disa ditë” për të mësuar më shumë rreth incidentit.
“Ekzistojnë disa mundësi të tjera, por mendoj se duam të kemi prova të qarta dhe të konsultohemi me aleatët tanë përpara se të nxjerrim përfundime të caktuara”, theksoi ai.
Polonia ka hedhur poshtë pretendimin e Donald Trump se incidenti mund të ketë qenë rezultat i një gabimi, në një deklaratë të rrallë mospajtimi nga një prej aleatëve më të ngushtë evropianë të SHBA-së me presidentin amerikan.
Ministri i Jashtëm i Polonisë deklaroi për agjencinë Reuters se Varshava shpreson që Uashingtoni do të ndërmarrë veprime për të treguar solidaritet me Poloninë. Në Kombet e Bashkuara, të premten, SHBA e quajti shqetësuese shkeljen e hapësirës ajrore dhe u zotua për mbrojtjen e “çdo centimetri të territorit të NATO-s”.
Nga ana tjetër, Moska tha se forcat e saj po kryenin sulme ndaj Ukrainës në kohën kur ndodhi hyrja e dronëve dhe se nuk kishin për qëllim goditjen e objektivave në Poloni.