Avokatja Alesia Balliu ka reaguar ashpër pas rizgjedhjes së Sali Berishës në krye të Partisë Demokratike, proces të cilin ajo e konsideron të dyshimtë, pasi në garë ishte vetëm kandidatura e kreut aktual të PD-së.
Në një reagim në rrjetet sociale, Balliu ka sulmuar drejtimin e opozitës dhe ka akuzuar familjen Berisha se po e përdor Partinë Demokratike për interesa personale dhe ekonomike.
“Sali, i vetmi i përdalë politik në PD e ka emrin Shkëlzen Berisha. I vetmi që po pasurohet nga qëndrimi në opozitë i PD-së është djali yt. Prandaj po e shkatërron PD-në dhe të ardhmen e saj, sepse demokratët varfërohen, ndërsa fëmijët e tu pasurohen”, shprehet Balliu.
Më tej, ajo bëri një krahasim të fortë politik duke deklaruar se ish-udhëheqësit komunistë Enver Hoxha dhe Ramiz Alia “do të ndiheshin krenarë” për atë që po ndodh sot në PD.
“Enver Hoxha dhe Ramiz Alia do të ndiheshin krenarë kur shohin rizgjedhjen tënde në krye të PD-së, sepse plani për të shkatërruar të djathtën vazhdon”, tha Balliu.
Në fund të reagimit të saj, Balliu i drejtohet drejtpërdrejt Shkëlzen Berishës, duke paralajmëruar përballje politike të vazhdueshme me të.
“Tani po i drejtohem Shkëlzenit, sepse ti je kthyer në një dordolec politik. Shkëlzen, përballë do të na kesh çdo ditë, sepse demokratët dhe Shqipëria nuk mund të trajtohen si biznes familjar”, përfundon reagimi i saj”, u shpreh Balliu.
