“Nuk ka asnjë skenar ku kjo ligjëratë të shkojë pa probleme”, thotë gazetari Guy Peleg gjysmë ore para një takimi në Teatrin Tzavta në Tel Aviv. Rreth 370 persona pritet të mbushin sallën për aktivitetin e së premtes në mesditë.
“Po përgatitem për një provokim. Në rastin më të mirë, do të më ngacmojnë teksa dal, siç ndodhi në ligjëratën time javën e kaluar. Skenari më i mundshëm është që të qëndrojnë në korridor dhe të bëjnë shumë zhurmë. Dhe skenari më realist është që disa të kenë blerë bileta për ta prishur gjithë ligjëratën nga brenda”.
Pranë tij qëndron një roje sigurie, i caktuar nga Channel 12 News i Izraelit.
“Është atmosfera, temperatura, që më bën të ndiej se kam nevojë për mbrojtje. Për shkak të numrit të madh të mesazheve kërcënuese që po marr, dhe sepse shumë njerëz më shkruajnë: ‘Kujdes veten’”, thotë ai.
“Motra ime më shkroi sot në mëngjes: ‘Kujdes veten dhe sigurohu që ndonjë i çmendur të mos të hedhë acid në fytyrë, siç i ndodhi Yoram Sheftel-it’”, thotë ai duke iu referuar avokatit që u sulmua në vitin 1988.
Peleg thotë se, përveç rojes së sigurisë, ka edhe “pak mbrojtje shtesë nga një grup aktivistësh, të cilët erdhën për të qëndruar mes meje dhe kujtdo që tenton të më kërcënojë”.
Mendova se hoqe dorë nga sigurimi. Çfarë ndryshoi?
“E anulova për dy ditë javën e kaluar vetëm sepse ndjeva se nuk po më mbronin siç duhet. Drejtori ekzekutiv i Channel 12 News, Avi Weiss, më qortoi, po ashtu edhe bashkëshortja ime. Ndryshuan kompaninë e sigurisë dhe problemi u zgjidh. Megjithatë, edhe tani mbrojtja nuk përputhet me nivelin e rrezikut që shoh”.
Peleg më tregon mesazhe që ka marrë, kërcënime si “Do ta paguash me gjak”, “Zoti do të të marrë” dhe një tjetër edhe më i frikshëm: “Peleg, i ke shumë të lezetshëm fëmijët. I do ata?”
Ai thotë se pjesa më e vështirë është barra që kjo situatëvendos bashkëshorten e tij, arkitekten Karin Horowitz Peleg dhe katër fëmijët e tyre, me të cilët jeton në Herzliya.
“Kam bërë më shumë se 40 kallëzime në polici muajin e fundit”, thotë ai. “Edhe me gjithë përvojën time, bëj kallëzim vetëm pasi një ekspert ligjor, ish-zyrtar i lartë i Prokurorisë, konfirmon se mesazhi përmban kërcënim të drejtpërdrejtë. Shpesh pyes veten: Si ka mundësi që ekzistojnë kërcënime të tilla, kërcënime reale me vdekje, dhe unë ende nuk kam dëgjuar për asnjë aktakuzë? Si mundet dikush që shkruan ‘Do ta paguash me gjak’ të vazhdojë jetën normalisht dhe të përgatitet për Shabat, sikur të mos ketë ndodhur asgjë?”
Dy ditë para ligjëratës në Tzavta, emisioni satirik izraelit Eretz Nehederet, i ngjashëm me “SNL”, transmetoi një skeç hapës të fuqishëm që paraqiste vendin duke u përballur me vrasjen e një gazetari, një referencë e drejtpërdrejtë ndaj kërcënimeve dhe ngacmimeve që ka përjetuar Peleg.
Në skeç, kryeministri Benjamin Netanyahu, i interpretuar nga Mariano Idelman, shpall një “Ditë Kombëtare të Por”, lojë fjalësh me hebraishten mes evel (zi) dhe aval (por).
“Të them të drejtën, pashë vetëm disa sekonda nga skeçi”, thotë Peleg. “Gazetari i Haaretz, Josh Breiner, kishte shkruar pak ditë më herët: ‘Mendoj se gazetari i parë që do të vritet do të jetë Guy Peleg’. Ai u ndje keq dhe më pyeti para se ta postonte. Të gjithë duhet të shkruajnë çfarë të duan. Nuk u duhet miratimi im, sidomos për satirë”.
Mes personave që Peleg beson se ka shumë gjasa ta ngacmojnë gjatë ligjëratës janë dy figura të njohura të asaj që njihet si “makineria e helmit” e Netanyahut: Aktivisti i ekstremit të djathtë Mordechai David dhe aktivisti i Likud-it, Eliran Dahan.
“Ku të shkosh, do të kesh nevojë për eskortë policie vetëm për të arritur te makina. Nuk do të të lejojmë të largohesh,” i tha David Peleg-ut pas një ligjërate të mëparshme në Tel Aviv, më 12 nëntor. Vërtet, Peleg u detyrua të largohej nën mbrojtjen e policisë.
“Oficerët erdhën menjëherë kur i thirrëm. Ishin korrektë dhe treguan simpati”, thotë Peleg. “Por kur kërcënime të tilla bëhen para policisë, është e paimagjinueshme që autori të mos arrestohej në vend”.
David, i dënuar më parë për tentativë zjarrvënieje ndaj një autobusi, është shndërruar në një figurë të preferuar të disa politikanëve të koalicionit.
Madje, muajin e kaluar, Knesseti e ftoi si të ftuar nderi në një seancë të Komitetit të Sigurisë Kombëtare, ironikisht, me temë ngacmimin e gazetarëve.
Peleg dhe Channel 12 News patën vetëm sukses të pjesshëm në përpjekjen për të marrë urdhër ndalimi ndaj Davidit: Gjykata vendosi kufizim vetëm dy metra, në vend të 500 metrave të kërkuara.
Eliran Dahan, nga ana tjetër, shfaq një fiksim obsesiv ndaj Peleg-ut në rrjetet sociale, duke nxitur ndjekësit të prishin ligjëratat e tij dhe duke publikuar video ku e akuzon për pedofili. Në korrik, ai humbi një padi për shpifje dhe u urdhërua të paguante 188 mijë shekelë, por ende nuk e ka bërë pagesën.
“Jam i lodhur, i shteruar dhe i shqetësuar”, thotë Peleg. “Po bashkëpunoj me gjashtë studio ligjore. E gjithë energjia ime shkon për të mbrojtur reputacionin dhe veten. Kjo është pikërisht ajo që ata duan, të më mbajnë në mbrojtje, të frikësuar dhe të rraskapitur”.
Ai argumenton se kemi të bëjmë me një përpjekje të organizuar për të frikësuar median e lirë.
“Qeveria po përpiqet, përmes intimidimit të organizuar, të ushtrojë presion mbi shtypin e lirë”, thotë ai.
Peleg, 56 vjeç, ka qenë korrespondent ligjor dhe analist për Channel 12 News për 19 vite. Ai u shndërrua në objektiv të qartë në vitin 2019, kur billboard-e të Likud-it shfaqën fytyrën e tij me mesazhin: “Ata nuk do të vendosin”.
Moment kyç ishte vera e vitit 2024, kur Prokurorja Ushtarake e Izraelit i dorëzoi atij një video që tregonte abuzimin e rëndë ndaj një të ndaluari palestinez në bazën Sde Teiman. Videoja u publikua me miratimin e censurës ushtarake dhe çoi në arrestimin e rezervistëve të përfshirë.
Që prej asaj kohe, Peleg është bërë shënjestër e një fushate të ashpër linçimi, me akuza për “shpifje gjaku” dhe tradhti.
“Unë u hodha në këtë situatë”, përsërit disa herë Peleg. “Nuk e kërkova këtë betejë, por nuk do të hesht”.
Ligjërata në Tzavta kalon pa incidente, pavarësisht kërcënimeve paraprake. Pas përfundimit, Peleg shtrëngon duart e mbështetësve dhe bën fotografi.
“Mendova se kishte një shans 1 në 1 milion që kjo të kalonte qetë”, thotë ai. “Tani jam i lodhur, sikur sapo kam dalë nga palestra, i rraskapitur nga tensioni”.
Megjithatë, ai mbetet i vendosur: “Nuk do të më frikësojnë. Nuk do të më heshtin”.
