Në një intervistë për podcastin “East Side Stories” në median austriake Die Presse, kryeminisri Edi Rama i qëndroi objektivit dhe angazhimit të Shqipërisë për anëtarësim brenda vitit 2030 në Bashkimin Evropian. Kreu i qeverisë u pyet nga gazetari Thomas Seifert se pse Shqipëria duhet të jetë brenda familjes së BE-së, teksa tha se Ballkani Perëndimor është i rëndësishëm për Unionin për çështje që lidhen me sigurinë dhe unitetin.
“Është shumë, shumë e veçantë në histori të kemi këtë realitet gjeopolitik të Bashkimit Evropian: dy kufij, një kufi i jashtëm dhe një kufi i brendshëm. Dhe në këtë rast, kufiri i brendshëm është Ballkani Perëndimor. Pra, për arsye që lidhen me sigurinë e Evropës, koalicionin e evropianëve, unitetin e Evropës, është e qartë, të paktën për mua, se nuk ka mënyrë tjetër veçse të integrohen vendet e Ballkanit Perëndimor brenda Bashkimit Evropian”, tha ai.
Kryeministri u ndal te pengesat që ka hasur Shqipëria më herët, por shtoi se situata ka ndryshuar. Ai tha se në këtë fazë nuk sheh asnjë rrezik, ndërsa shtoi se “më vonë sigurisht, do të duhet të bëjmë më shumë.” Kreu i qeverisë theksoi se detyrat e shtëpisë, Shqipëria nuk po i bën për të kënaqur Unionin, por për ta bërë vendin më evropian dhe më demokratik.
“Nuk e bëjmë këtë “detyrë shtëpie” për t’i kënaqur ata. E bëjmë këtë detyrë për të ndryshuar Shqipërinë dhe për ta bërë Shqipërinë më evropiane, më demokratike, më të bazuar në institucionet e veta dhe jo tek personalitetet e veta, etj., etj. Pra, Bashkimi Evropian është burimi i vetëm i këtij lloji njohurish. Nuk e gjen askund tjetër. Marr shembullin e Afganistanit ose Irakut. Ata dështuan shumë sepse nuk kanë perspektivën e Bashkimit Evropian dhe sepse askush tjetër nuk mund t’i mësojë një vendi të ndërtojë institucione. Amerikanët nuk kanë durim për këtë. Ata kanë filozofinë e të rregullosh gjërat me bomba dhe pastaj të predikosh. Por procesi i gjatë është diçka që vetëm Bashkimi Evropian e di si ta bëjë. Dhe diçka që vetëm Bashkimi Evropian e ka, të themi, nuk mund ta quaj thesar kombëtar, sepse nuk është vetëm një komb, është thesari i këtij kontinenti. “, tha Rama.
Rama ndalet edhe te drejtësia, teksa tha se po bëjnë gjithçka për të mos e cenuar pavarësinë e saj.
“Kam thënë se duhet të ndërtojmë mekanizma të drejtësisë që duhet të jenë në gjendje të provojnë pavarësinë e tyre, duke hetuar, duke investiguar dhe duke dënuar, pa marrë parasysh nga cila anë vjen çështja. Nuk është aq këndshme sa të shkosh në operë. Është e dhimbshme. Është e hidhur. Por është mënyra e vetme. A është perfekte? Jo. A bëjnë gjithashtu gabime? Sigurisht që bëjnë. Por në fund të ditës, duhet të bëjmë gjithçka që të mos prekim pavarësinë që u kemi dhënë atyre”, tha ai.
Për marrëdhëniet ndërkombëtare, Rama tha Shqipëria është një vend i vogël dhe nuk e la luksin që të zgjedhë. Duke u ndalur te Rusia, Rama tha se janë “ndarë” prej dekadash, për të cilën tha se “nuk na mungon”.
“Kur bëhet fjalë për ne, mendoj se jemi shumë të vegjël për të zgjedhur. Pra, duhet të flasim me të gjithë dhe të jemi në gjendje të kuptojmë sa më shumë të gjithë. Kur bëhet fjalë për Rusinë, kemi një marrëdhënie shumë të veçantë për shkak të një historie të veçantë. Pra, jemi ndarë me Rusinë në vitin 1960 sepse ne donim të ruanim Stalinin, ata donin të çliroheshin nga Stalini. Dhe kjo ndodhi. Ne ruajtëm Stalinin, jo Bashkimin Sovjetik për 30 vitet e ardhshme. Dhe kjo krijoi një pakënaqësi shumë të madhe në psikologjinë e popullit tonë për rusët dhe Rusinë. Prandaj, pas 35 vjetësh, të themi, jete demokratike, nuk kemi pasur kurrë një vizitë në Rusi dhe nuk jemi vizituar nga Rusia. Dhe, sinqerisht, nuk na mungon”, tha ai.
Një “këshillë” jep edhe për BE-në, teksa thotë se duhet të flasë vetë me Rusinë dhe të mos e delegojë politikën e vet të jashtme në Uashington, sepse Moska është fqinj i Unionit dhe jo i SHBA.
“Kur bëhet fjalë për Bashkimin Evropian, mendoj se Bashkimi Evropian duhet të flasë me Rusinë. Dhe nuk duhet të vazhdojë t’i delegojë politikën e vet të jashtme në Uashington, sepse në fund të ditës, Rusia është fqinj i Bashkimit Evropian, jo fqinj i Shteteve të Bashkuara. Dhe me fqinjët, duhet të flasësh”, tha Rama.