Negociatorët kryesorë të Iranit ndodhen në Katar në kuadër të përpjekjeve për të avancuar bisedimet indirekte mes Teheranit dhe Shteteve të Bashkuara, ndërsa Doha po shfaqet gjithnjë e më shumë si ndërmjetës kyç në procesin diplomatik. Sipas mediave iraniane, Ministri i Jashtëm Abbas Araghchi dhe Kryetari i Parlamentit Mohammad Bagher Ghalibaf po zhvillojnë takime për të diskutuar çështjet më të ndjeshme të pazgjidhura, me synimin për të arritur një memorandum mirëkuptimi mes palëve.
Pjesë e delegacionit iranian është edhe Guvernatori i Bankës Qendrore, një zhvillim që interpretohet si sinjal se në tryezë janë edhe diskutimet për zhbllokimin e aseteve iraniane jashtë vendit. Kjo mbetet një nga kërkesat kryesore të Teheranit në kuadër të çdo marrëveshjeje të mundshme me Uashingtonin.
Burime diplomatike i thanë Al Jazeera-s se çështje më komplekse, përfshirë programin bërthamor dhe uraniumin e pasuruar në nivel të lartë, janë lënë për një fazë të mëvonshme të negociatave. Aktualisht, fokusi i palëve mbetet te masat për ndërtimin e besimit dhe uljen e tensioneve rajonale.
Një nga temat më të ndjeshme vazhdon të jetë Ngushtica e Hormuzit, korridor strategjik për tregtinë globale të energjisë. Zëdhënësi i Ministrisë së Jashtme të Iranit, Esmaeil Baghaei, deklaroi se çështja e lundrimit në këtë zonë lidhet me koordinimin mes Iranit dhe Omanit. Ai theksoi se Teherani ka ofruar shërbime sigurie për anijet që kalojnë përmes ngushticës.
Ndërkohë, Ministria e Jashtme e Omanit njoftoi se ministri i saj i Jashtëm, Badr Albusaidi, zhvilloi një bisedë telefonike me Kryeministrin dhe Ministrin e Jashtëm të Katarit, Sheikh Mohammed bin Abdulrahman bin Jassim Al Thani.
Sipas njoftimit zyrtar, telefonata u zhvillua në kuadër të konsultimeve rajonale dhe koordinimit të qëndrimeve për çështjet kryesore të sigurisë dhe diplomacisë në rajon. Dy zyrtarët diskutuan edhe mënyrat për të mbështetur përpjekjet që synojnë arritjen e një “konsensusi të dëshiruar”, përfshirë rifillimin e plotë të lundrimit detar përmes Ngushticës së Hormuzit.
Analisti Omar Rahman, bashkëpunëtor në Këshillin e Lindjes së Mesme për Çështjet Globale, e cilësoi praninë e delegacionit iranian në Katar si një “shenjë pozitive”, megjithëse paralajmëroi se pengesat kryesore mbeten ende të pazgjidhura.
“Irani ka fituar një ndikim të konsiderueshëm përmes kontrollit të tij de facto mbi një pjesë të rëndësishme të ekonomisë globale”, deklaroi Rahman për Al Jazeera. Sipas tij, Teherani synon ta shfrytëzojë pozicionin e tij strategjik në Ngushticën e Hormuzit si instrument afatgjatë ndikimi, një qasje që kundërshtohet si nga vendet e rajonit ashtu edhe nga SHBA-ja.
Rahman shtoi se një aspekt që ka marrë më pak vëmendje është ai i dëmshpërblimeve të luftës, duke sugjeruar se Irani mund të ketë shfaqur fleksibilitet në këtë drejtim gjatë diskutimeve. Megjithatë, sipas tij, negociatat mbeten komplekse dhe një marrëveshje nuk duket ende afër.
“Ka ende shumë çështje në tryezë që kërkojnë diskutim dhe zgjidhje”, tha ai.
