Që nga dita e djeshme, 16 imazhe që lidhen me rastin e financuesit të njohur pedofil, Jeffrey Epstein, janë hequr pa shpjegim nga faqja e internetit e Departamentit të Drejtësisë së SHBA-së.
Mes fotove të hequra, njëra tregon një komodinë në shtëpinë e Epstein, me sirtarin e hapur brenda të cilit dukeshin foto të tjera, përfshirë një të Donald Trump, Melania Trump dhe Ghislaine Maxwell. Një tjetër foto thuhet se tregon presidentin amerikan me vajza të veshura me rroba banje.
12 nga imazhet e zhdukura tregojnë gjithashtu piktura të grave të zhveshura dhe sallonin e famshëm të masazhit, vend ku janë kryer shumica e sulmeve të dyshuara seksuale, shkruan Corriere della Sera.
Demokratët në Komitetin Mbikëqyrës të Dhomës së Përfaqësuesve e ripostuan këtë informacion në mediat sociale, duke kërkuar transparencë: “Çfarë tjetër po mbulohet? Publiku amerikan ka të drejtë të dijë.”
Dokumentet ishin pjesë e arkivit që administrata Trump u detyrua ta publikonte sipas ligjit, por për shumë njerëz, publikimi i dytë i dokumenteve u duk zhgënjyes, pasi nuk sqaron lidhjet mes Epstein dhe njerëzve të fuqishëm në Amerikë. Mediave u ka tërhequr vëmendjen mungesa e intervistave kyçe të FBI-së me të mbijetuarit dhe memorandumeve të brendshme mbi akuzat.
“Ndjej sikur Departamenti i Drejtësisë dhe sistemi po na zhgënjejnë përsëri”, thotë Marina Lacerda, e cila ka akuzuar Epsteinin për abuzim seksual në Nju Jork kur ishte vetëm 14 vjeç.
Jeffrey Epstein u arrestua në korrik 2019 për abuzim seksual me fëmijë dhe trafikim. Më 10 gusht të atij viti, ai u gjet i vdekur në qelinë e tij në Qendrën Korrektuese Metropolitan në Nju Jork.