Përmes një postimi në rrjetet sociale, demokrati Ervin Salianji ka kritikuar bojkotin e seancës nga opozita dhe mungesën e Sali Berishës në momentin kur në Kuvend ishte i pranishëm kryeministri Edi Rama.
Sipas tij, Berisha po zhvillon një “teatër politik”, duke sulmuar publikisht Ramën, por duke shmangur përballjen direkte me të në Parlament.
“Sali Berisha kreu sot një tjetër akt tradhtie ndaj demokratëve dhe opozitarëve. Nuk është rastësi që gjithnjë e më shumë demokratë dhe qytetarë kërkojnë largimin e tij, duke e konsideruar pjesë të së njëjtës bashkëqeverisje me Edi Ramën”, shprehet Salianji.
Ai shton se, ndërsa qytetarët po protestojnë kundër qeverisë dhe presin një përballje të fortë politike në Kuvend, Berisha zgjedh të largohet nga seanca, duke i krijuar sipas tij lehtësi kryeministrit.
“Sali Berisha kreu sot një tjetër akt tradhtie ndaj demokratëve dhe opozitarëve. Nuk është rastësi që gjithnjë e më shumë demokratë dhe qytetarë kërkojnë largimin e tij, duke e konsideruar pjesë të së njëjtës bashkëqeverisje me Edi Ramën. Në bashkëpunim me njëri tjetrin e kërkon Ramën me gjasme çdo ditë kur Rama mungon e ndërkohë që ai vjen në parlament, Berisha e braktis me një teatër që tani e kanë kuptuar të gjithë!
Në një moment kur qytetarët janë ngritur në këmbë kundër qeverisë dhe Shqipëria pret një përballje të fortë parlamentare me Ramën, Berisha zgjedh të bëjë teatër politik paradite, vetëm për t’i hapur rrugë dhe për të mos e vënë në vështirësi kryeministrin gjatë paraqitjes së tij në seancë.
Regjimi Rama–Berisha po i merr frymën demokracisë, po asgjëson opozitën reale dhe po bashkëqeveris në dëm të interesit publik. Shqiptarët meritojnë një alternativë të vërtetë, jo një konflikt të inskenuar që në fund i shërben mbajtjes së të njëjtit sistem në pushtet”, shkruan Salianji në rrjetet sociale.
