Ambasadorët e 27 vendeve anëtare të Bashkimit Europian kanë miratuar draftin e përkohshëm të EUCP-së, duke i hapur rrugë zhvillimit të Konferencës Ndërqeveritare me Shqipërinë, e cila do të mbahet më 26 maj 2026 në Bruksel, në orën 19:00.
Konfirmimi i datës së Konferencës Ndërqeveritare konsiderohet një tjetër hap i rëndësishëm në procesin e negociatave të Shqipërisë për anëtarësim në Bashkimin Europian dhe vjen në një moment kur vendi synon të avancojë me hapjen dhe mbylljen e grupkapitujve kryesorë.
Takimi i së martës do të jetë Konferenca e tetë e Anëtarësimit mes Shqipërisë dhe BE-së dhe do të fokusohet kryesisht te Grupkapitulli i parë, i njohur si “Bazat”, i cili konsiderohet edhe shtylla kryesore e procesit të integrimit europian.
Sipas njoftimit zyrtar, konferenca do të shërbejë për të konfirmuar përmbushjen e standardeve të ndërmjetme nga Shqipëria, si dhe për të përcaktuar standardet përmbyllëse për kapitujt që lidhen me funksionimin e institucioneve demokratike, reformën në administratën publike dhe sundimin e ligjit.
Në fokus do të jenë veçanërisht Kapitulli 23, që lidhet me gjyqësorin dhe të drejtat themelore, si dhe Kapitulli 24, që përfshin drejtësinë, lirinë dhe sigurinë. Këta konsiderohen ndër kapitujt më të rëndësishëm dhe më të ndjeshëm në procesin e negociatave me Bashkimin Europian.
Po ashtu, pjesë e diskutimeve do të jenë edhe kriteret ekonomike dhe financiare, përfshirë Kapitullin 5 për prokurimin publik, Kapitullin 18 për statistikat dhe Kapitullin 32 për kontrollin financiar.
Procesi i integrimit europian të Shqipërisë ka hyrë në një fazë më intensive gjatë muajve të fundit.
