Dhjetëra deputetë të PD që mbushën sallën e Gjykatës së Apelit duket se nuk arritën ta shpëtonin Ervin Salianjin nga drejtësia.
Gjykata e Apelit ka lene ne fuqi sot denimin me 1 vit burg per deputetin demokrat i cili u shfaq i zverdhur para kamerave pas seancës.
Ai tha se eshte i denuari i parë politik pas 30 vitesh. Sipas tij, ky vendim i Apelit është diktuar nga bandat.
Salianji tha se do ta bëjë dënimin ku të dojë mazhoranca dhe se fushatën do ta vijojë edhe nga qelia.
Apeli ka lene keshtu vendimin e Shkalles se Pare teksa deputeti i PD akuzohet per kallezim te rreme ne lidhje me rastin ‘Babalja’.
Gjykata e Shkallës së Parë vendosi se audio-përgjimi ishte inskenim dhe i shpalli fajtorë të 4 të pandehurit Fredi Alizoti (për të cilin Apeli la gjithashtu në fuqi vendimin e Shkallës së Parë), Albert Veliun, Jetmir Olldashin si dhe Ervin Salianjin.
Çfarë ndodhi në seancë?
Në nisje të seancës pati debate. Shkak u bë një vendim i Gjykatës së Krimeve të rënda që pushoi hetimet për trafik droge për Geron Xhafajn, vëllain e ish-ministrit të Brendshëm, Fatmir Xhafaj.
Mbrojtja e Salianjit argumentoi se vendimi nuk mund të administrohej si provë në këtë fazë ku ndodhet procesi pasi vendimi është sjellë me postë nga avokati i Xhafajt.
Madje kjo solli edhe reagimin e vetë Salianjit.
“Të vijë një vendim në këtë fazë, është e paligjshme”, mësohet të jetë shprehur ai sipas asaj që raporton gazetarja Glidona Daci e cila ndodhet në sallën e gjyqit.
Kjo ka sjellë edhe reagimin e vetë trupës gjykuese që i kanë bërë thirrje Salianjit të bëjë kujdes me etikën.
“E vërteta është më e kujdesshme se etika”, iu përgjigj sërish deputeti.
Ndërkohë avokati i Geron Xhafajt theksoi se vendimi është sjellë në përputhje me ligjin.
Pas kësaj Gjykata e Apelit vendosi të çelë shqyrtimin gjyqësor dhe të administrojë si provë vendimin, që një javë më parë u bë temë debati në seancë. Më pas vendosi që të të tërhiqet për vendim përfundimtar.
Salianji: Alizoti u pagua nga drejtues të Policisë
Një ditë më parë, Ervin Salianji doli në një konferencë për mediat, ku publikoi prova të reja në lidhje me dosjen.
Ai publikoi një përgjim të prokurorisë ku sipas pretendimeve të demokratit ish-drejtori i policisë se Fierit, Albert Nushi i jep para Fredi Alizotit për të pranuar se kishte gënjyer në lidhje me përfshirjen në trafikun e drogës të vëllait të ish-ministrit të Brendshëm, Fatmir Xhafaj. Deputeti Salianji thotë se ekzistojnë dhe përgjime të tjera në dosjen zyrtare të Prokurorisë.
I gjithë ky skenar sipas deputetit është me qëllim implikimin e tij në këtë çështje si dhe për të shpëtuar nga një dënim i ri vëllain e Fatmir Xhafajt.
“E gjithë sajesa në lidhje me gjyqin për kallëzimin e pabërë është depozituar në Gjykatë vetëm për arsye që të shmanget nga dënimi i ri vëllai i ministrit të Brendshëm të kohës”, tha ai një ditë më parë.
Gjyqi “Babalja”
Në lidhje me këtë çështje, gjyqtari Artan Gjermeni i Gjykatës së Shkallës së Parë dënoi me 1 vit burg Salianjin më 18 Dhjetor 2019. Për kallëzim të rremë u dënua me 2 vite burg edhe Fredi Alizoti, i cilësuar si dëshmitari i rremë në audiopërgjim.
Albert Veliu, i njohur me nofkën “Babalja”, u dënua me 3 vjet e 5 muaj burg, për veprat penale kalim i paligjshëm i kufirit dhe kallëzim i rremë. Ndërsa për gazetarin Jetmir Olldashi, Gjykata vendosi që dënimin me 6 muaj burg ta konvertonte me 100 orë punë.
Në atë kohë, deputeti Salianji paralajmëroi se do t’i drejtohet Gjykatës së Apelit dhe asaj të Strasburgut, pasi sipas tij vendimi ndaj tij ishte mafioz dhe i urdhëruar politikisht.
/a.r