Juristja shqiptare me aktivitet në Francë, Alba Bajraktari, duke folur në emisionin “ÇdoKënd” nga Merita Haklaj në A2CNN, u shpreh se protestat qytetare përbëjnë një hap të rëndësishëm për të ushtruar presion ndaj sistemit politik.
Sipas saj, kjo është një lëvizje e parë drejt shkundjes së sistemit, por theksoi se nuk beson se një protestë e vetme mund të prodhojë një forcë politike që më pas të ndryshojë gjithçka, duke argumentuar se sistemi aktual zgjedhor e bën të vështirë garën e partive të vogla në kushte të barabarta.
“Kjo është lëvizja e parë për mendimin tim, jo drejt modifikimit të sistemit, por drejt një shkundje të parë të sistemit. Një presion për të prodhuar diçka, dhe që të paktën të kenë këtë koshiencë, sepse ishin në neglizhiencë të plotë të qytetarëve. Nuk mendoj dhe ne e kemi shumë të qartë të gjithë që kjo protestë mund të prodhojë një parti dhe pastaj kjo parti do ndryshojë gjithçka, sepse sistemi zgjedhor u pamundëson partive të vogla politike që të garojnë në kushte të barabarta për shumë arsye”.
Juristja shtoi se përgjegjësia për të kanalizuar këtë mbështetje u takon aktorëve të ndryshëm politikë e shoqërorë, të cilët nuk është e domosdoshme të jenë pjesëmarrës në protesta. Sipas saj, alternativa mund të vijë si nga figura të konsoliduara që kanë ruajtur integritetin e tyre, ashtu edhe nga individë të papërfshirë më parë në politikë.
“Unë i qëndroj faktit që është proces, nëse kjo frymë është krijuar dhe janë mijëra vetë, tregon që janë mijëra vota të gatshme për alternativa të mundshme. U takon aktorëve të mundshëm, kjo s’do të thotë që duhet të jenë detyrimisht pjesëmarrës në protestë. Mund të jenë edhe figura të konsoliduara në sistem, por që s’janë bërë pjesë e inkriminimit, kanë ruajtur dinjitetin e tyre, apo ndoshta edhe njerëz të apolitizuar”.
