Erion Veliaj do të dalë sot 31 tetor, nga qelia e paraburgimit në Durrës, ku ndodhet prej muajit shkurt, për të marrë pjesë personalisht në seancën publike të Gjykatës Kushtetuese.
Seanca, e cila pritet të nisë në orën 10:00, do të shqyrtojë ankesën e tij ndaj vendimit të qeverisë, që e shkarkoi nga posti i kryebashkiakut të Tiranës.
Gjykata Kushtetuese ka miratuar kërkesën e Veliajt për të qenë i pranishëm dhe i ka kërkuar Drejtorisë së Burgjeve dhe SPAK-ut të marrin masat për transportin dhe sigurinë e tij gjatë zhvillimit të seancës.
Qeveria e shkarkoi Veliajn më 25 shtator, duke u mbështetur në nenin 62 të ligjit “Për vetëqeverisjen vendore”, pasi ai nuk ishte paraqitur në detyrë për më shumë se tre muaj.
Vetëm pak ditë më vonë, presidenti Bajram Begaj shpalli zgjedhjet e pjesshme për Bashkinë e Tiranës, por procesi u pezullua me vendim të përkohshëm nga Gjykata Kushtetuese, derisa të merret vendimi përfundimtar mbi ligjshmërinë e shkarkimit.
Në argumentet e tij, Veliaj pretendon se qeveria ka vepruar jashtë kompetencave, pasi, sipas Kushtetutës, një kryebashkiak mund të shkarkohet vetëm në rast të shkeljeve të rënda të ligjit ose të Kushtetutës, dhe vetëm pas një vendimi gjyqësor të formës së prerë. Ai thekson se mungesa e tij në zyrë është pasojë e pamundësisë objektive, pasi ndodhet në paraburgim.
Në krahun tjetër, qeveria mbron qëndrimin se vendimi për shkarkim është marrë në bazë të ligjit për qeverisjen vendore, duke e bërë Gjykatën Administrative dhe jo atë Kushtetuese, organin kompetent për këtë çështje.
Në seancë pritet që Veliaj të mbështetet edhe në një opinion të Komisionit të Venecias, ku theksohet se largimi i një të zgjedhuri vendor nga detyra duhet të konsiderohet një masë ekstreme, pasi prek autonominë vendore dhe të drejtat themelore politike.
Komisioni paralajmëron gjithashtu se paraburgimi i gjatë i një zyrtari të zgjedhur mund të kufizojë të drejtat e tij për pjesëmarrje në jetën publike, të mbrojtura nga Konventa Evropiane për të Drejtat e Njeriut.
Erion Veliaj ndodhet në arrest që prej 10 shkurtit, nën hetim për pesë akuza të ndryshme, mes tyre korrupsion, shpërdorim detyre, pastrim parash dhe mosdeklarim pasurie. Edhe bashkëshortja e tij, Ajola Xoxa, është përfshirë në të njëjtën dosje hetimore, ku dyshohen për korrupsion në nëntë raste të ndryshme.