Gjatë fjalimit të tij në Kolegjin e Evropës në Bruzh, kryeministri Edi Rama deklaroi se paqja dhe e ardhmja e kontinentit varen nga përshpejtimi i procesit të zgjerimit të Bashkimit Evropian, duke paralajmëruar se çdo vonesë rrezikon të thellojë nacionalizmin dhe të dobësojë ndikimin ekonomik e politik të Evropës. Mes të tjerash, ai shtoi se frika e vërtetë është “ballkanizimi i Europës”.
“Shqipëria është e përkushtuar ndaj procesit. Një gjë është e sigurt. Ne vërtet jemi të përkushtuar dhe Federica më mësonte se ky ishte vërtet një proces bazuar në meritë, kurse unë besoj se ky është proces bazuar në martesë. Besoj duhet shumë për të firmosur një kontratë. Shikoni Britaninë, kështu që më mirë, martohu, rri aty brenda dhe shijo shoqërinë e mirë.
E vërteta është se qëkur Putini pushtoi Ukrainën, procesi u bë real. BE-ja jo vetëm e tregoi me fjalë por me vepra, duke nxitur një proces më të shpejtë.
Nuk është diçka që duhet ta bëni ju për ne, por duhet ta bëni për veten pikërisht sepse ato segmente kundër zgjerimit po thonë jo. Sigurisht për sigurinë e vet. Paqja nuk është kurrë e përhershme, duhet mbrojtur përditë dhe duhet të jetë një busull e jetës së përditshme, pa pasur një luftë për të vendosur sa është e rëndësishme. Nuk është vetëm mbrojtje. Çdo zgjerim, dhe çdo herë zgjerimi ka qenë një motor rritjeje. Sot janë fuqi të tjera që po shfaqen: Kina, Brazili, më të uritura, më të shpejta. Evropa rrezikon të mbetet pas ekonomikisht dhe të humbasë rëndësinë e saj. Për të ruajtur rëndësinë e saj, Evropa duhet të bëhet më e madhe dhe të bëjë bashkë të gjitha vendet demokratike të Evropës, çka e bën atë një forcë mjaft të madhe zhvillimi.
Mësimet janë të qarta. Çështja është: a do merren seriozisht? Vonesa është e rrezikshme, shumë e rrezikshme. Dëgjova sërish Mario Draghín që e përsëriste këtë me forcë. Dëshpërimi shkon deri tek ai qytetari mesatar i zakonshëm. Dëshpërimi mbjell nacionalizëm.
Në Ballkan, ne jemi në një pozitë shumë më të mirë, por tashmë jemi shumë, shumë të shqetësuar për ballkanizimin e Evropës.
Evropa do të jetë e ardhmja jonë, ose nuk do të jetë më. Që Evropa të vazhdojë Evropë, ribashkimi duhet të jetë domosdoshmëri.”, tha Rama.