Komisioni për Çështjet Europiane është mbledhur paraditen e së premtes për të shqyrtuar projekt pozicionin negociues për Grupkapitullin e V-të “Burimet, bujqësia dhe kohezioni” për negociatat me BE-në.
Opozita ka bojkotuar mbledhjen që po drejtohet nga zëvendës kryetarja Etilda Gjonaj, me pretendimin se po zhvillohet në kundërshtim me Kushtetutën. Kryetarja e Komisionit, Jorida Tabaku në një sqarim për Shqiptarja.com tha se mbledhja s’mund të zhvillohet jashtë sesionit parlamentar.
Sipas saj, deputetët e thirrur sot nuk janë rizgjedhur për një tjetër mandat në Kuvend, dhe nuk e kanë legjitimitetin që të thërrasin mbledhje.
“I sqarova qeverisë që mbledhja e Komisionit jashtë sesionit është antikushtetuese. Për një javë fillon sesioni i ri parlamentar dhe opozita e ka prioritet procesin e integrimit dhe do të bëjë çdo gjë në dorë të saj ashtu si ka bërë në çdo rast për këtë process. Ofrova disa zgjidhje praktike si mund ta kalonim këtë ngërç por qeveria vazhdoi në mënyrë të njëanshme. Asnjë nga deputetët që sot kanë thirrur mbledhje nuk janë të rizgjedhur dhe nuk e kanë legjitimitetin të thërrasin mbledhje jashtë sesioni”, tha Tabaku.