Deputetja e Partisë Demokratike, Flutura Açka, ka reaguar me një shkrim të titulluar “Prania e padukshme”, ku shprehet se opozita shqiptare po përballet me një sistem të ngritur në katër vitet e fundit, i cili ka funksionuar vetëm për “matrikullimin e rebelëve, shenjimin, izolimin dhe asimilimin e tyre”.
Sipas Açkës, ky sistem u konkretizua politikisht më 27 korrik 2024 dhe ndikimi i parë u reflektua në zgjedhjet e 11 majit 2025, ndërsa pasoja të tjera do të ndihen në muajt që vijnë.
Deputetja thekson mungesën e rolit të elitës demokrate që ka drejtuar vendin në 35 vitet e fundit: ministra, drejtorë, kryetarë e zyrtarë të lartë që, sipas saj, kanë përfituar privilegje nga demokratët, por sot nuk mbajnë asnjë përgjegjësi. “Ku janë ata sot, kur demokratët janë keq?”, pyet Açka.
Në shkrimin e saj, ajo thekson se në këtë “sistem heshtjeje” nuk duket sikur ekziston opozita. “Ka kryeministër dhe CEO rajonalë të kompanisë Albania. Nuk e shihni, ndaj thoni se nuk ekziston prania e padukshme. Opozita duhet t’i dalë zot detyrës që ka marrë përsipër”, shprehet deputetja.
Açka shton se nuk synon të marrë përsipër “detyrat e mëdha”, por vetëm të ngrejë zërin për një realitet që, sipas saj, rrezikon të çojë shoqërinë drejt “amnezisë politike”.
“Prania e padukshme
Dje thashë dy fjalë për hallet demokrate. Përcjellja ishte në përgjithësi korrekte. Por, ka prej atyre që i përdorin fjalët e të tjerëve si mish për të uritur. Punë për ta!
Çështja është se në katër vitet e fundit është ndërtuar një sistem dhe në kēto kohë është marrē vetëm me matrikullimin e rebelëve, shenjimin, izolimin, përkashtimin, asimilin e tyre.
Një bashkëpunim i pastër politik për këtë u bē më 27 korrik 2024. Ndikimi i parë ishin zgjedhjet e 11 majit 2025. Të tjerat vijnë nga shtatori e më pas.
Kur fola për elitën demokrate, e kisha fjalēn për të gjithë ata që në 35 vitet é fundit kanë qenë ministra, drejtorë, shefa, kryetarë é gjithfarë, që kanë pasur të gjitha privilegjet prej demokratëve, dhe kanē fjalën dhe aksionin e tyre në ditën edhe kür demokratët janë keq. Ku janë ata?
Në këtë sistem heshtjeje, duket sikur nuk ka Opozitë. Ka kryeministër dhe CEO rajonalë të kompanisë Albania. Nuk e shihni, ndaj thoni se nuk ekziston prania e padukshme. Opozita duhet t’i dalë zot detyrës që ka marrë përsipër.
Unë vetëm e përmenda. Nuk mëtoj të bëj detyra të mëdha, se pasagjere e trenit që u kthye në karrocë opozitare, isha. Nuk shoh se ka kush ndonjë përgjegjësi. Nëse themi që nuk ekziston prania é padukshme, ajo do të na asfiksojë një nga një, derisa të shkojmë në amnezi politike.
Foto: Prania e padukshme” Long Phi Tran” – shkruan Açka.