Shtëpia e Bardhë po planifikon të ndërtojë një sallë balloje me vlerë prej 200 milionë dollarësh duke përmbushur një dëshirë që presidenti Donald Trump e ka shprehur shpeshherë, raporton BBC.
Salla e re e vallëzimit do të ndërtohet ngjitur me Krahun Lindor “të modernizuar” të Shtëpisë së Bardhë ku ndodhen zyrat e Zonjës së Parë, Melania Trump dhe pika të tjera të rëndësishme të institucionit.
Paratë do të dhurohen drejtpërdrejt nga Trump dhe donatorë të tjerë anonimë, ndërsa puna do të nisë në shtator, sipas Sekretares së Shtypit, Karoline Leavitt.
Trump ka premtuar vazhdimisht se do të ndërtojë një sallë “të bukur” balloje në Shtëpinë e Bardhë dhe në vitin 2016 u ofrua të paguante 100 milionë dollarë gjatë administratës Obama, por asokohe presidenti refuzoi.
Në një konferencë të shkurtër për gazetarët gjatë së enjtes, Leavitt tha se “shtesa e nevojshme dhe e jashtëzakonshme” në Shtëpinë e Bardhë do të jetë rreth 8360 metra katrorë dhe mund të qëndrojnë 650 persona.
Shumë evente formale mbahen në Dhomën Lindore të Shtëpisë së Bardhë që mund të mirëpresë afërsisht 200 persona.
Salla e re, shtoi Leavitt, do të eliminojë nevojën për vendosjen e “një tende të madhe dhe të pakëndshme” gjatë darkave shtetërore dhe eventeve të tjera të mëdha ku përfshihen edhe udhëheqësit botërorë.
Sipas saj, ndërtimi pritet të mbarojë “shumë përpara” përfundimit të mandatit të Trump në janar të 2029-ës.
Modelet paraprake që Shtëpia e Bardhë ka publikuar tregojnë se salla e ballos do t’i përngjajë nga ana arkitekturore, do të ketë mobilim luksoz me llambadarë dhe kolona të zbukuruara.