Një vendim absurd nga drejtësia e politizuar, e ka cilësuar Jozefina Topalli vendimin e djeshëm të Apelit të Posaçëm për detyrim paraqitje ndaj Sali Berishës. Në një postim në Facebook, Topalli theksoi se ky është një akt që sfidon logjikën juridike dhe parimet themelore të drejtësisë.
“Dje kemi qenë dëshmitarë të një tjetër vendimi politik nga sistemi i drejtësisë: detyrimi për paraqitje ndaj Sali Berishës, liderit të opozitës. Ky është një akt që sfidon logjikën juridike dhe parimet themelore të drejtësisë. Ky vendim, i marrë kur hetimet janë mbyllur, nuk është thjesht i pa mbështetur ligjërisht; ai është një absurd juridik që sfidon çdo parim të shtetit ligjor. Në fakt, absurdi ka shoqëruar çdo fazë të këtij procesi politik”.
Sipas saj Berisha është arrestuar pa akuza dhe është mbajtur në arrest shtëpie për 333 ditë, në shkelje të Kushtetutës dhe ligjeve, raporton A2 CNN.
“Berisha është arrestuar pa akuza. Kryetari i opozitës është mbajtur në arrest shtëpie për 333 ditë, në shkelje të hapur të Kushtetutës dhe ligjeve të vendit. Është dënuar nga një gjyqtare e shkarkuar për korrupsion nga vetë Presidenti Berisha. Procesi ka nisur nga një ministër i qeverisë aktuale. Bazohet në një VKM kolegjiale të miratuar 20 vite më parë”.
Sikurse Berisha edhe Topalli e lidh vendimin e djeshëm të Apelit të Posaçëm me fushatën elektorale.
“Me vetëm 4 muaj nga zgjedhjet, është e pamundur të mos e lidhim këtë proces me fushatën elektorale dhe përdorimin e drejtësisë nga pushteti aktual. Kjo është një “gjueti shtrigash” e orkestruar për të ndikuar në rezultatin zgjedhor. Ironikisht, duke ndjekur këtë rrugë të gabuar, kundërshtarët e tij po e shndërrojnë Sali Berishën në një figurë të persekutuar padrejtësisht, e cila në vend që të dobësohet, fiton mbështetje dhe solidaritet. Historia ka treguar se padrejtësitë vetëm i forcojnë figurat si Berisha dhe i rrënjosin më thellë në ndërgjegjen publike. “Kur drejtësia bëhet e politizuar, ajo humbet çdo lidhje me ligjin dhe shndërrohet në një mjet të pushtetit, duke cenuar themelet e një shoqërie të drejtë dhe të barabartë.” Drejtësia e politizuar nuk është drejtësi!”, thekson Topalli.
