Një shqiptar është mes 1500 personave që presidenti amerikan Joe Biden fali ose u lehtësoi dënimet.
Sipas mediave të huaja bëhet fjalë për Francesk Shkambin, i dënuar në vitin 2014 me 27 vite burg për drejtimin e një organizate kriminale që kontrabandonte drogë në SHBA nga Shqipëria.
Nga dokumentet e gjykatës rezulton se Shkambi ishte përgjegjës për trafikimin e sasive të mëdha të kokainës, heroinës, marijuanës dhe pilulave ekstazi.
“Juria e gjeti Shkambin përgjegjës për trafikimin e 85 kilogramë kokainë, 4 kilogramë heroinë, afërsisht 55 kg marijuanë dhe 4000 pilula ekstazi”, tregojnë të dhënat.
Sipas Byrosë Federale të Burgjeve (BOP), Shkambi pritej të lirohej në vitin 2029.
Faljet e fundit të presidentt Biden ngjallën reagime të shumta, përfshirë këtu edhe debate mbi përfshirjen e individëve me dënime të larta në listën e të falurve.
Por sipas shtëpisë së Bardhë, Biden ka falur shtetas të cilët kanë treguar rehabilitim të suksesshëm dhe një angazhim të fortë për t’i bërë komunitetet e tyre më të sigurta.
Biden fali më parë edhe djalin e tij Hunter, i cili përballej me dënim për akuzat për mashtrime me taksa dhe është dënuar për një rast që lidhet me armëmbajtje./a.m.