Rusia mund të jetë e gati ushtarakisht të sulmojë vendet e NATO-s në pesë deri në tetë vjet, nëse vendos ta bëjë, pasi të rindërtojë forcat e saj të goditura nga pasojat e luftës në Ukrainë, tha zyrtari i lartë ushtarak i Gjermanisë.
“Deri në atë kohë, bazuar në analizën tonë, Rusia do t’i ketë rindërtuar forcat e saj në atë masë sa të jetë i mundur një sulm në vendet e NATO-s,” u tha gazetarëve Carsten Breuer gjatë vizitës në Poloni.
“Nuk po them se kjo do të ndodhë, por është e mundur”, tha ai.
Pushtimi rus i Ukrainës në shkurt 2022 ka shkaktuar krizën më të thellë në marrëdhëniet e Moskës me Perëndimin që nga kriza e raketave Kubane e vitit 1962.
Por Moska i ka hedhur poshtë vazhdimisht pretendimet perëndimore se mund të jetë duke e konsideruar sulmin ndaj NATO-s si absurditet të plotë. Presidenti Vladimir Putin përsëriti muajin e kaluar se Rusia nuk ka plane kundër asnjë vendi të NATO-s, megjithëse ai tha se mund të rrëzojë çdo avion luftarak F-16 që Perëndimi i jep Ukrainës.
Nga 32 anëtarët e NATO-s, gjashtë ndajnë një kufi me Rusinë: Norvegjia, Finlanda, Estonia, Letonia, Lituania dhe Polonia.
Rusia tani duket se po fiton gjithnjë e më shumë terren në Ukrainë, ku konflikti karakterizohet nga një luftë e stilit të Luftës së Parë Botërore dhe nga lufta me dronë të teknologjisë së lartë.
Moska aktualisht kontrollon një të pestën e territorit të Ukrainës, duke përfshirë gadishullin e Krimesë, të cilin e aneksoi në vitin 2014.
“Ne shohim se Rusia prodhon shumë materiale luftarake dhe nuk e dërgon të gjithë këtë material në vijën e frontit në Ukrainë… kështu që në vitin 2029 ne duhet të jemi gati”, tha kreu i forcave të armatosura gjermane Breuer.
Zyrtarët ukrainas e kanë vlerësuar fuqinë numerike të ushtrisë në rreth 800,000, ndërsa në dhjetor Putin urdhëroi forcat e armatosura ruse të rrisin personelin e saj me 170,000 në 1,300,000.
Përveç personelit ushtarak, shpenzimet e mbrojtjes ushtarake të Moskës i kalojnë ato të Ukrainës. Në vitin 2024, 109 miliardë dollarë u caktuan për këtë sektor, më shumë se dyfishi i shpenzimeve të Ukrainës prej 43.8 miliardë dollarësh./m.j
