Një pikë karburanti në qytetin e Klosit është grabitur në orët e para të mëngjesit nga dy persona të maskuar, të cilët dyshohet se kanë marrë një shumë parash pasi kanë kërcënuar punonjësin e subjektit.
Sipas informacioneve paraprake, njëri prej autorëve ka mbajtur nën kontroll punonjësin e karburantit, ndërsa grabitësi tjetër ka marrë paratë që ndodheshin në kasafortë. Pas grabitjes, të dy autorët janë larguar nga vendngjarja.
Deri më tani nuk është bërë e ditur vlera e shumës së grabitur, ndërsa ende nuk dihet nëse autorët kanë qenë të armatosur gjatë kryerjes së grabitjes.
Menjëherë pas njoftimit, në vendngjarje kanë mbërritur shërbimet e Policisë, të cilat kanë nisur veprimet hetimore për zbardhjen e plotë të rrethanave të ngjarjes, identifikimin dhe kapjen e autorëve.
Hetimet vijojnë, ndërsa policia po punon për sigurimin e provave dhe verifikimin e kamerave të sigurisë në zonë.