Biznesmeni shqiptar Ermal Beqiri do të vazhdojë të qëndrojë në paraburgim në Francë, ndërsa drejtësia franceze shqyrton çështjen e tij në një kohë kur Shqipëria ka kërkuar ekstradimin. Media franceze “Paris-Normandie” ka publikuar detaje të reja mbi arrestimin, pasuritë e identifikuara në Francë, kërkesën e tij për t’u liruar dhe argumentet me të cilat Prokuroria franceze kërkoi vazhdimin e qëndrimit në qeli.
Beqiri, 44 vjeç, përfundoi në duart e autoriteteve franceze pas fluturimit me avionin e tij të lehtë mbi centralin bërthamor të Penly, mes Dieppe dhe Le Tréport, një zonë me ndjeshmëri të lartë sigurie.
Media franceze sjell edhe një detaj të pazakontë për momentin që parapriu fluturimin mbi central. Sipas saj, më 25 korrik Beqiri kishte vendosur të telefononte nënën ndërsa ndodhej në komandën e avionit të tij të lehtë mbi Seine-Maritime. “Paris-Normandie” ngre si pikëpyetje nëse bëhej fjalë për shpërqendrim apo gabim drejtimi, ndërsa fakt është se avioni përfundoi duke fluturuar mbi centralin bërthamor të Penly.
Pas uljes në aeroportin e Méaulte, pranë Albert në Somme, Beqiri u ndalua nga autoritetet. Ai u paraqit përpara Prokurorit dhe më pas u gjykua për fluturim të paautorizuar mbi centralin bërthamor, nëpërmjet procedurës së pranimit të fajësisë.
Për këtë shkelje ai u dënua me një gjobë prej 7 mijë eurosh. Media franceze e konsideron këtë shumë pothuajse një episod dytësor për një person që e përshkruan si milioner.
Por përfundimi i kësaj procedure nuk solli lirimin e tij.
Ndërsa Beqiri ndodhej ende nën shoqërimin e xhandarmërisë franceze, autoritetet e Francës u vunë në dijeni për kërkesën e Shqipërisë për ekstradimin e tij. “Paris-Normandie” shkruan se ai kërkohet në Shqipëri për çështjen që lidhet me mashtrimin dhe një skemë të organizuar në tenderët publikë me vlera që arrijnë në miliona euro.
Në Shqipëri, emri i Ermal Beqirit është pjesë e hetimit të SPAK për dosjen e tenderëve të Agjencisë Kombëtare të Shoqërisë së Informacionit, AKSHI. Hetimi ka ngritur pikëpyetje të forta edhe për shkak të profilit të Beqirit dhe aksesit që ai ka pasur ndër vite në sektorin e teknologjisë dhe në sisteme të lidhura me institucionet shtetërore.
Shkrimi i plotë
“Ti nuk na telefonon kurrë”: nëse nuk është jetim, çdo fëmijë e ka dëgjuar të paktën një herë këtë fjali nga nëna e tij. Ndonjëherë edhe kur kishte folur me të në telefon vetëm një ditë më parë… Kështu, më 25 korrik, Ermal Beqiri, një shqiptar 44-vjeçar, vendos të telefonojë nënën e tij.
Biznesmeni ndodhet në komandën e avionit të tij të lehtë, mbi Seine-Maritime. Shpërqendrim? Gabim kursi? Ai përfundon duke fluturuar mbi centralin bërthamor të Penly, mes Dieppe dhe Le Tréport, një zonë tejet e ndjeshme. Kur ulet në aeroportin e Méaulte, pranë Albert, në departamentin Somme, e pret një “komitet pritjeje”. Ai arrestohet, paraqitet para prokurorit dhe më 27 gjykohet në Amiens për fluturim të paautorizuar mbi centralin bërthamor, nëpërmjet procedurës së pranimit të fajësisë. Dënohet me një gjobë prej 7 000 eurosh, një episod i vogël për një njeri që përshkruhet si milioner.
Ermal Beqiri u arrestua më 25 gusht në Méaulte, pasi kishte fluturuar mbi centralin bërthamor të Penly.
Megjithatë, që prej asaj dite ai nuk e ka rifituar lirinë. Ndërsa ndodhet ende nën shoqërimin e xhandarëve, Franca merr nga Shqipëria një kërkesë për ekstradimin e tij. Ai kërkohet në vendlindje për mashtrim dhe mashtrim të kryer në grup të organizuar. Dyshohet se ka luajtur rol në një skandal të gjerë korrupsioni të lidhur me tenderë të manipuluar, me shuma që arrijnë në miliona euro.
SPAK (Prokuroria e Posaçme shqiptare kundër korrupsionit), sipas deklaratave të raportuara nga AFP në fillim të muajit gusht, vlerëson se “hetimet plotësuese të kryera nga autoritetet franceze kanë […] mundësuar identifikimin e disa pasurive me origjinë kriminale” të Ermal Beqirit në territorin francez.
Prokuroria shqiptare përmend në veçanti “llogari bankare me një shumë totale mbi dy milionë euro, dy apartamente”, “një avion turistik”, “automjete”, si edhe një “kështjellë në departamentin Oise, në veri”, një “blerje” e vlerësuar në “rreth 2,6 milionë euro”.
Sipas disa mediave shqiptare, bëhet fjalë për Château d’Auteuil, në Berneuil-en-Bray, në jug të Beauvais.
Në vendin e shqiponjave, Ermal Beqiri nuk ka qenë gjithmonë ky person i përjashtuar. Inxhinier i sistemeve të informacionit, i arsimuar në Francë, ai ka mbajtur poste të rëndësishme në institucione publike, ndërkohë që është prezantuar si ekspert i pavarur, veçanërisht – për ironi të fatit – në luftën kundër krimit kibernetik.
Në vitin 2021, ai bleu kompaninë Soft & Solution, të cilën më pas e zhvilloi në tregun shqiptar të teknologjisë së informacionit. Në faqen e tij në LinkedIn, ai ka vendosur në plan të parë një fotografi përkrah presidentit Macron, e realizuar me sa duket në maj 2025, gjatë vizitës zyrtare të presidentit francez në Shqipëri.
Prej një muaji, ai fle jo shumë larg prej andej, në burgun e Beauvais. Të enjten e kaluar, më 20 gusht, ai paraqiti para dhomës së hetimit të Gjykatës së Apelit të Amiens një kërkesë për t’u liruar.
Për avokatin e tij, ai është viktimë e një “ndalimi të paligjshëm”. Avokati kujton se klienti i tij, përpara episodit të Penly, kishte mësuar nga shtypi i vendit të tij se ishte person në kërkim dhe kishte njoftuar për këtë autoritetet franceze:
“Ai u vu në dispozicion, dha adresën e tij, si mund të flitet për një ‘person në kërkim që është arratisur’?”
Prokuroria kundërshton lirimin e biznesmenit, me argumentin se mundësitë e tij financiare dhe licenca si pilot do t’i mundësonin t’u shmangej shpejt autoriteteve.
Ermal Beqiri e merr fjalën i fundit: “Kam mbërritur në Francë në moshën 16-vjeçare, këtu kam familjen time të dytë. Po, lëviz shumë, Turqi, Slloveni, Francë… Mund të kisha shkuar kudo, edhe në Dubai, por e dua Francën. Edhe pse nuk kam zgjedhur vendin më të mirë për t’u fshehur, as më të mirin për taksat…”
Këtë të martë, më 28 gusht, gjykata dha vendimin e saj: Ermal Beqiri do të qëndrojë në paraburgim.
