Vijon aksioni kundër ‘kërpudhave’ mashtruese të quajtuara call-center në Tiranë. Ditën e sotme është zhvilluar një operacion i koordinuar nga Prokuroria e Tiranës, në bashkëpunim me autoritetet austriake, ku janë goditur dy call center-a që përdoreshin për mashtrimin e qytetarëve europianë dhe përfitimin e shumave të konsiderueshme parash. Ky aksion vjen pasi u goditën a call-centerat në pronësi të Granit Pepnikës më 13 prill të këtij viti.
Aksioni u zhvillua pranë zonës së Liqenit të Thatë në kryeqytet, ku autoritetet ushtruan kontrolle në ambientet e dy subjekteve të dyshuara. Gjatë ndërhyrjes janë gjetur dhe sekuestruar kompjuterë që dyshohet se përdoreshin për aktivitetin e paligjshëm, ndërsa në ambiente janë konstatuar edhe operatorë që ushtronin aktivitetin e tyre.
Sipas burimeve hetimore, operacioni është realizuar në kuadër të një bashkëpunimi ndërkombëtar me autoritetet austriake, të cilat po asistojnë në hetimin e skemës së dyshuar të mashtrimit që kishte në shënjestër qytetarë të vendeve europiane.
Operacioni i drejtuar nga Prokuroria e Tiranës, në bashkëpunim me autoritetet austriake, konsiderohet vazhdim i aksionit të nisur në muajin prill, kur u zbuluan tre call center-a të shpërndarë në 12 ambiente në kryeqytet. Atëherë u arrestuan 10 persona dhe u sekuestruan rreth 900 mijë euro cash, ndërsa hetuesit ngritën dyshime për ekzistencën e një organizate të mirëstrukturuar me shtrirje ndërkombëtare.
Sipas dosjes hetimore, skema funksiononte përmes platformave të rreme të investimeve online. Viktimat në Gjermani, Itali, Greqi, Spanjë, Britaninë e Madhe dhe vende të tjera josheshi nga reklama mashtruese në internet, ku u premtoheshin fitime të shpejta dhe investime të sigurta. Pas regjistrimit, ata kontaktoheshin nga operatorë që prezantoheshin si këshilltarë financiarë ose brokerë profesionistë.
Pasi fitonin besimin e viktimave, operatorët i bindnin të transferonin vazhdimisht para në llogari dhe platforma që në dukje funksiononin si bursa investimi. Në realitet, fondet nuk investoheshin kurrë, por kalonin në një zinxhir kompanish dhe llogarish të kontrolluara nga organizatorët e skemës. Në shumë raste, viktimat mashtronin për herë të dytë, pasi kontaktoheshin nga persona që premtonin rikuperimin e humbjeve kundrejt pagesave të reja.
