Deputeti Agron Shehaj është përjashtuar nga seanca plenare pas një debati të ashpër që pati me ministrin e Financave Petrit Malaj.
Në interpelancën e kërkuar nga Shehaj për faljen e gjobës për Bankers Petroleum, ministri i Financave doli në Kuvend duke pyetur Shehajn se çfarë lidhje ka kompania IDS me familjen e tij. Në një fletë të printuar, Malaj nxorri një listë për të cilën tha se aty ishin 17 kompanitë e Agron Shehajt, shumica e atyre jashtë Shqipërie.
“Hajde trego këtu si nxjerr paratë që fiton në Shqipëri, jashtë Shqipërie, je marrë ti me ne, do merrem dhe unë me ty”, tha Malaj.
Shehaj iu përgjigj duke thënë se ajo kompani dihet botërisht që zotërohet prej tij.
“E di gjithë Shqipëria që IDS është kompania ime. Kanë ardhur qindra miliona euro nga ajo kompani, janë paguar rroga, taksa. Unë nuk jam si ju. Kompanitë e mia janë publike, i ke te deklarata ime e pasurisë. Po na bën sikur ke zbuluar diçka”, tha Shehaj.
Pas një shkëmbimi tjetër akuzash, ku Malaj i valëviste fletën A4 me listën e kompanive të Shehajt, ky i fundit u hodh në akuza se nëse këto kërcënime ia bën atij në Kuvend, çfarë i bie që i bën shqiptarëve.
“Pa më thuaj pak, vetë në shtëpi hyre dhe e bëre atë fletën me kompanitë e mia, apo vure stafin tënd të ministrisë të merret me kompanitë e mia? Si në kohën e komunizmit, merreni me familjen time, po s’ju vjen turp fare? Po një qytetari të thjeshtë, çfarë i bën ti more maskara? Çfarë i bën? Më thuaj? I dërgon policinë? Më kërcënon haptas, si guxon? Si guxon, maskara. Je maskara, je një maskara, placo, hajdut”, tha Shehaj.
Kjo përgjigje mjaftoi që nënkryetarja socialiste e Kuvendit ta përjashtonte Shehajn nga Kuvendi.