Komiteti i Përfaqësuesve të Përhershëm të Shteteve Anëtare të Bashkimit Evropian (COREPER) ka miratuar mbajtjen e Konferencës së 8-të Ndërqeveritare Shqipëri-Bashkimi Evropian, më 26 maj.
Sipas vendimit, konfirmohet plotësimi i kushteve të ndërmjetme në Grupkapitullin “Themelorët”, si dhe përcaktohen kushtet për mbylljen e negociatave të anëtarësimit për Kapitullin 23 “Gjyqësori dhe të Drejtat Themelore” dhe Kapitullin 24 “Drejtësia, Liria dhe Siguria”.
Mbajtja e kësaj konference hap zyrtarisht rrugën që Shqipëria të hyjë në fazën e mbylljes së negociatave për anëtarësim në Bashkimin Evropian.
Vendimi vlerëson progresin e qëndrueshëm të Shqipërisë në përmbushjen e prioriteteve kryesore të procesit të integrimit, veçanërisht në forcimin e shtetit të së drejtës dhe konsolidimin e institucioneve demokratike.
Po ashtu, theksohet progresi në reformën në drejtësi, duke përfshirë funksionimin e pavarur dhe efikas të institucioneve të drejtësisë, si dhe luftën kundër korrupsionit dhe krimit të organizuar.
Në fushën e të drejtave të njeriut, vlerësohen zhvillimet në lirinë e shprehjes dhe të medias, të drejtën e pronës, respektimin e pakicave kombëtare, si dhe barazinë dhe mosdiskriminimin, në përputhje me standardet e Bashkimit Evropian.
Bashkimi Evropian rikonfirmon mbështetjen për perspektivën evropiane të Shqipërisë dhe vlerëson angazhimin e institucioneve në zbatimin e reformave për forcimin e shtetit të së drejtës, konsolidimin demokratik dhe zhvillimin e qëndrueshëm ekonomik e shoqëror.
“Më 26 maj në Bruksel, Konferenca Ndërqeveritare Shqipëri-BE vulos me sukses fazën hyrëse dhe çel fazën përmbyllëse të negociatave të anëtarësimit. Sepse ndryshe nga si e përflasin ditë e natë ata që gjithnjë humbasin në fund, Shqipëria Europiane që po ndërtojmë është një histori suksesi, e cila shkruhet me vizion, punë e përkushtim, hap pas hapi, e në fund gjithnjë fiton”, lajmëroi më herët kryeministri Edi Rama.
Kujtojmë se takimi paraardhës i këtij niveli u mbajt në nëntor të vitit 2025, kur u hap grup-kapitulli i fundit i negociatave me BE, “Bujqësia dhe Kohezioni”. Gjë që sipas kreut të qeverisë u arrit në një kohë rekord, për vetëm 12 muaj!
Viti që lamë pas shënoi një sërë momentesh kyçe sa i takon këtij procesi, që pikënisjen e pati në korrik të 2022-it, kur u çelën negociatat. 16 vjet pas firmosjes së marrëveshjes së Stabilizim-Asociimit, u bë realitet ëndrra e kahershme e shqiptarëve për rrugëtimin e vendit drejt Unionit.
Megjithatë, siç e ka deklaruar edhe Komisionerja për Zgjerimin e BE-së, Marta Kos, “tanimë mbyllja e grup-kapitujeve është çmimi real për Shqipërinë”.
“Vijoni me reformat”, ka qenë apeli i vazhdueshëm nga ndërkombëtarët, por realizimi i të gjithë detyrave mbetet një proces kompleks. Vetë kryeministri ka deklaruar se ka disa fusha ku nevojitet më shumë punë.
“Sfida e sfidave”, për të është grup-kapitulli që lidhet me sigurinë ushqimore dhe mbrojtjen e konsumatorit.
“Reforma e inspektimit duhet të vazhdojë dhe është kyç drejtimi politik i saj nga të gjitha ministritë në sensin e mbrojtjes së saj nga ndërhyrjet partiake dhe qokat politike. Ka filluar me AKU-në, po shtrihet në inspektoriatet e tjera për të garantuar burime njerëzore cilësore”, ka theksuar Rama.
