Sabah Nuzi, i akuzuar si vrasës me pagesë, do të qëndrojë i izoluar në regjimin “41biss”. Vendimi, sipas raportimeve, është firmosur nga ministri i Drejtësisë, Toni Gogu. Ky është vendimi i parë që një i burgosur mbyllet në regjimin ‘41biss’ në 5-muajt e fundit. Në këtë regjim izolohen të dënuar ose të paraburgosur ndaj të cilëve ka informacione se kanë lidhje të forta me grupe apo organizata kriminale dhe që konsiderohen me rrezikshmëri të lartë.
Vendimi për izolimin e Nuzit në regjimin ‘41biss’ ka ardhur pas disa operacioneve që janë zhvilluar në burgjet shqiptare, për gjetjen e sendeve të paligjshme që arrijnë të hyjnë në qelitë e personazheve që vuajnë dënimet, ose janë të paraburgosur. Edhe pse nuk ka një informacion zyrtar mbi arsyet sepse Nuzi është izoluar në ‘41biss’, raportohet se një praktikë e ngjashme do të aplikohet edhe për emra të tjerë të botës së krimit, që konsideron me rrezikshmëri të lartë ose pjesë e grupeve të krimit të organizuar.
Nuzi akuzohet për ekzekutimin e 22-vjeçarit, Klevis Lleshi, ngjarje e ndodhur një vit më parë. Dyshohet se Nuzi kreu vrasjen kundrejt një pagese prej 50 mijë eurosh.
Sabah Nuzi është arrestuar si pjesë e grupit kriminal të drejtuar nga Aurel Hoxha, i cili konsiderohet nga hetuesit si porositësi i atentatit ndaj të riut. Hetimet kanë zbardhur se Nuzi ka pasur rolin e ekzekutorit, ndërsa autoritetet dyshojnë se ai ka qenë i përfshirë edhe në aktivitete të tjera të paligjshme në kuadër të grupit.
Nuzi vuante dënimin në burgun e Fushë-Krujës, por me rikthimin në funksion të regjimit “41 Biss”, ai është transferuar në Peqin, ku do të qëndrojë nën masa të forta izolimi dhe kontrolli.
“41 Biss”, i frymëzuar nga modeli italian kundër mafias, konsiderohet një nga format më të ashpra të mbikëqyrjes penitenciare.
Ai aplikohet ndaj personave që dyshohen se edhe nga burgu mund të japin urdhra apo të ruajnë lidhje me organizata kriminale. Të burgosurit në këtë regjim izolohen nga pjesa tjetër e të dënuarve, monitorohen në mënyrë të vazhdueshme dhe kanë komunikime tepër të kufizuara.
Rihapja e këtij regjimi shihet si një sinjal i fortë i autoriteteve shqiptare në luftën kundër krimit të organizuar dhe goditjes së strukturave kriminale që vazhdojnë aktivitetin edhe nga qelitë e burgjeve. Institucioni i Peqinit pritet të jetë një nga pikat kyçe për zbatimin e masave të reja të sigurisë ndaj emrave të konsideruar me rrezikshmëri të lartë në vend.
