Prej muajit dhjetor 2025, Ergys Agasi është shpallur në kërkim nga SPAK, por ndërkohë që po (bëjnë sikur) e kërkojnë, Gysi vazhdon të kontrollojë në distancë Drejtorinë e Përgjithshme të Antikrimit Kibernetik në Policinë e Shtetit.
Drejtoreshë e Përgjithshme e Antikrimit Kibernetik vazhdon të jetë Ervina Gjana, pjesë aktive e grupit të Ergys Agasit, e lidhur nëpërmjet bashkëshortit të saj Renato Hristiç, i përfshirë dhe në grupe e veprimtari të tjera kriminale.
Më 16 dhjetor 2025, me vendim të SPAK-ut dhe Gjykatës së Posaçme, drejtoreshës Ervina Gjana iu sekuestrua telefoni, kompjuterët, dokumentet në zyrë dhe materiale të shumta në shtëpi, që përbëjnë indicie dhe prova veprash penale.
Sekuestroja u krye në kuadër të një hetimi për përfshirje në grup të strukturuar kriminal me aktivitet mashtrime online, call-center, ndërhyrje në sistemet informatike dhe TIMS, dekonspirim të dhënash sekrete të policisë e bashkëpunim në krimin kibernetik, me bashkëshortin Renato Hristiç, në favor të Ergys Agasit.
Megjithëse në hetim nga SPAK, me akuza për përfshirje personalisht e familjarisht në veprimtari kriminale dhe grup të strukturuar, Ervina Gjana vazhdon të jetë Drejtoreshë e Përgjithshme e Antikrimit Kibernetik në Policinë e Shtetit.
Mbajtja në detyrë e anëtares së grupit “Agasi” është cenim i sigurisë dhe konfidencialitetit për informacionin e brendshëm të policisë dhe agjencive shqiptare e agjencive të huaja partnere, që shkëmbejnë të dhëna për luftën kundër krimit.
Nisur nga ky profil i Ervina Gjanës dhe rastet e mëparshme të hetimit penal të saj për lidhje me krimin, është emergjente ta shkarkojnë nga detyra e madje ta largojnë nga shërbimi policor, sepse de facto, Drejtoria e Përgjithshme e Antikrimit Kibernetik kontrollohet nga Ergys Agasi.
Për më tepër, Ervina Gjana rezulton me 4 dosje të tjera penale në Prokurorinë e Tiranës, në SPAK dhe në Agjencinë e Mbikëqyrjes Policore.
Më 2 gusht 2023, bashkë me Drejtorin e IT-së në Policinë e Shtetit, Ervin Muça, Drejtoresha e Antikrimit Kibernetik, Ervina Gjana, grabiti databazën me të dhënat sekrete të Policisë së Shtetit.
Grabitën të dhënat për hyrje-daljet e personave në pikat kufitare, dokumentet biometrike, dosjet për ngjarjet kriminale, aksionet e policisë, listat e personave të dyshuar për terrorizëm, personat në gjurmim e kërkim, komunikimet dhe raportet sekrete mes policisë, drejtësisë, agjencive të sigurisë dhe partnerëve të huaj.
Më 30 maj 2014, kur Ervina Gjana ishte specialiste IT në Drejtorinë e Policisë së Shtetit, SHÇBA-ja e kallëzoi në Prokurori dhe e pezulloi nga detyra, pasi kishte vjedhur hard diskun e kompjuterit zyrtar ku ruheshin të dhëna tepër sekrete.
Në muajin janar 2025, ndaj Drejtoreshës së Antikrimit Kibernetik, Ervina Gjana, u depozitua një tjetër kallëzim në Prokurorinë e Tiranës, por çështja u pushua në heshtje.
Pra, policia po kërkon të arrestojë Ergys Agasin, por faktikisht, ai është brenda kupolës së policisë dhe informohet për gjithçka, nëpërmjet “ushtares” së grupit të tij kriminal, Ervina Gjana, Drejtoreshë e Përgjithshme e Antikrimit Kibernetik.