Ish-drejtori i FBI-së, James Comey, është vënë sërish nën akuzë nga Departamenti Amerikan i Drejtësisë, në një zhvillim të ri që ka tërhequr vëmendjen e mediave ndërkombëtare.
BBC shkruan se akuzat lidhen me një postim të mëparshëm në Instagram, ku Comey kishte publikuar një imazh me guaska deti që formonin numrat “86 47”. Edhe pse detajet zyrtare të akuzës nuk janë bërë ende publike, ky postim është interpretuar nga disa figura politike si një mesazh kërcënues ndaj presidentit të 47-të të SHBA-ve, Donald Trump. Vetë Comey ka deklaruar se nuk e ka ditur kuptimin e këtyre numrave.
“Unë nuk e dija që disa njerëz i lidhin këta numra me dhunën,” tha ai. “Nuk më kishte shkuar në mendje, por unë jam kundër çdo forme dhune, ndaj e hoqa postimin.”
Kjo është hera e dytë që ndaj tij ngrihen akuza. Më herët, në shtator, ai ishte akuzuar se kishte gënjyer Kongresin dhe për pengim të një hetimi parlamentar lidhur me rrjedhje informacioni në media.
Megjithatë, çështja u rrëzua disa muaj më vonë nga një gjykatë federale, pasi u konstatua se prokurori që kishte ngritur akuzat ishte emëruar në mënyrë të parregullt.
Rasti i fundit lidhet edhe me një hetim të Shërbimit Sekret amerikan, i cili kishte marrë në pyetje Comey-n për postimin në fjalë. Ai më pas e fshiu publikimin dhe sqaroi se kishte menduar gabimisht se imazhi kishte kuptim politik, duke shtuar se kundërshton çdo formë dhune.
Presidenti Donald Trump, i cili prej kohësh ka qenë kritik ndaj Comey-t, ka reaguar duke thënë se kuptimi i postimit ishte i qartë dhe “edhe një fëmijë do ta kuptonte”.
Ndërkohë, gjykata ka lënë të hapur mundësinë që çështja ndaj ish-drejtorit të FBI-së të rihapet në të ardhmen. Pas vendimit të mëparshëm për rrëzimin e akuzave, Comey kishte deklaruar se beson që mund të jetë sërish objekt i hetimeve të reja.