Alarm për bombë në qendrën tregtare “Toptani”, në qendër të Tiranës, këtë mbrëmje, 25 prill. Siç raportohet, u evakuuan qytetarët.
Gazetarja e Klan News, Glidona Daci, bëri me dije se informacioni për bombë kishte mbërritur në email-in e shefit të sigurisë së qendrës.
“Po kontrollohet me qen antieksploziv dhe forcat xheniere“, tha gazetarja. Informacion ky, që e konfirmoi edhe Policia.
“Rreth orës 20:10, shtetasi A. D, ka njoftuar sallën operative të DVP Tiranë se në email e tij ka ardhur një mesazh se në qendrën tregtare ku ai punon si shef security është vendosur një sasi lëndë plasëse, e cila do shpërthejë në orën 20:30.
Menjëherë në vendngjarje kanë shkuar shërbimet e Policisë, Forcat Xheniere dhe shërbimet e Antiterritorit, të cilët kanë kontrolluar qendrën dhe nuk kanë konstatuar asgjë të paligjshme. Grupi hetimor po punon për identifikimin e shtetasit që ka dërguar emailin dhe për sqarimin e rrethanave të rastit“, njoftojnë blutë.
Pas kontrolleve të kryera, rezulton se nuk është konstatuar asgjë shqetësuese.
