Askush nuk mund të parashikojë se çfarë do të bëjë Donald Trump në ditët në vijim në lidhje me Iranin. Ka disa indikacione që ai po kërkon një mundësi për të dalë nga lufta, ndërsa gjithashtu ka shenja kontradiktore.
Presidenti deklaroi të martën se lufta do të përfundojë «shumë shpejt», por gjithashtu tha se mund të jetë e vërtetë ajo që ka thënë Pete Hegseth, se lufta është vetëm «në fillim». Mbrëmjen e djeshme ai shtoi se lufta po shkon «shumë mirë» dhe se «po bëjmë shumë mirë, duke shtuar se “Irani do të paguajë një çmim shumë të lartë”. Por edhe kostoja e konfliktit po rritet.
Disa zyrtarë të Pentagonit thanë të martën në Senat se lufta ka kushtuar më shumë se 11,3 miliardë dollarë në gjashtë ditët e para. Senatori demokrat Chris Coons nga Delaware beson se shifra do të jetë edhe më e lartë, nëse përfshihen edhe «kostot për zëvendësimin e armëve të përdorura, që tashmë kalojnë mbi 10 miliardë dollarë».
Në një vizitë në Ohio dhe Kentucky të mërkurën, presidenti foli shpesh me gazetarët për të siguruar se ndikimi i luftës në ekonomi, për të cilën amerikanët kishin shprehur shqetësime edhe para nisjes së konfliktit, nuk do ishte shumë i lartë. Sekretari i Energjisë, Chris Wright, tha për CNN: «Nuk ka mungesa ose një treg të ngushtë të naftës në hemisferën perëndimore. Problemi është në Azi». Ai shtoi se administrata ka përqendruar përpjekjet e saj në «zgjidhje pragmatike për të kaluar disa javë të mungesës së energjisë».
Sekretari i Thesarit, Scott Bessent, njoftoi gjithashtu se ishte autorizuar blerja e naftës ruse, një masë e përkohshme. Shtëpia e Bardhë po shqyrton gjithashtu mundësinë e një përjashtimi të përkohshëm nga një ligj për transportin detar, i njohur si “Jones Act”, për të mundësuar që dërgesat e energjisë dhe produkteve bujqësore të qarkullojnë shpejt midis porteve amerikane.
Përjashtimi nga ky ligj do të lejonte anijet e huaja të transportonin karburant midis porteve amerikane, duke ulur mundësisht kostot e transportit dhe përshpejtuar dorëzimet.
«Shtetet e Bashkuara janë prodhuesi më i madh në botë, kështu që kur çmimet e naftës rriten, ne bëjmë shumë para», deklaroi Trump në Truth Social. «Por, edhe më i rëndësishëm dhe i interesuar për mua si president është të parandaloj që Perandoria e Keqe, Irani, të ketë armë bërthamore dhe të shkatërrojë Lindjen e Mesme dhe botën. Kjo nuk do të ndodhë kurrë!».
Çmimi i naftës është rritur me 8%, duke arritur pothuajse 100 dollarë për fuçi. Kur u pyet nëse mund të arrinte deri në 200 dollarë, Wright u përgjigj se kjo është «e pamundur». Por problemi nuk është vetëm nafta: shtetet e Gjirit Persik kanë investuar në sektorë si qendrat e të dhënave dhe fonderitë e aluminit, të cilat janë vulnerabël ndaj sulmeve me raketa dhe dronë iranianë.
Eksportet e heliumit, jetike për prodhimin e mikroçipave në Korenë e Jugut, janë bllokuar. Gjiri Persik është gjithashtu një qendër e rëndësishme për prodhimin e plehrave dhe fermerët amerikanë frikësohen për një rritje të çmimeve.
New York Times supozon se Trump mund të bëjë prapa, sikurse ka bërë me tarifat, pra mund të tërhiqet dhe të kërkojë të dalë nga lufta me Iranin, pa një fitore të dukshme. Podkasteri i njohur Joe Rogan, që ka mbështetur Trump në 2024, tha në shfaqjen e tij të martën se lufta me Iranin është «një çmenduri» dhe se amerikanët ndihen «të tradhtuar» nga presidenti. «Ai premtoi gjatë fushatës ‘asnjë luftë nuk do ketë: duhet t’i japim fund këtyre luftërave të padobishme’. Dhe tani po e bëjmë një luftë dhe nuk mundemi as ta definojmë qartë se përse po e bëjmë atë».
Nëse Irani detyron Shtetet e Bashkuara të përfundojnë luftën para se të shqyrtohet çështja e hapjes së ngushticës së Hormuzit (dhe të ndalojë regjimin që ta përdorë atë për të ndikuar në tregtinë globale), kjo do të përbënte një humbje për Trump dhe për fuqinë dhe prestigjin e Amerikës. Megjithatë, nëse Trump arrin të vendosë një qeveri pragmatike në Teheran, kjo mund të përbënte një fitore për të.
Sipas analistit Walter Russell Mead, skenari më i mundshëm është një zgjidhje e mesme, ku Shtetet e Bashkuara «çlirojnë në masë Gjirin Persik, por regjimi aktual i Iranit mbijeton», dhe në këtë rast operacioni «Furia Epike» mund të mbahet mend si «Nëna e të gjitha pastrimeve», që nuk zgjidh asgjë thelbësore, por ruan balancën e fuqisë në një pjesë jetike të botës.
Washington Examiner raporton se Trump i tha gazetës se nuk di nëse lufta me Iranin do ta ndihmojë për të fituar Çmimin Nobel për Paqen. «Nuk e di. Nuk më intereson. Nuk flas për Çmimin Nobel për Paqen», tha ai.
