Një ngjarje e rëndë ka ndodhur në ujërat territoriale të Kubës, ku roja bregdetare kubane ka hapur zjarr ndaj një motoskafi të regjistruar në Florida, Shtetet e Bashkuara, duke lënë katër persona të vrarë dhe gjashtë të plagosur. Sipas autoriteteve në Havanë, personat në bord kishin për qëllim të kryenin një infiltrim të armatosur me “qëllime terroriste”.
Sipas Ministrisë së Brendshme kubane, motoskafi është pikasur rreth një milje detare larg zonës së quajtur Cayo Falcones, në provincën Villa Clara, rreth 250 kilometra nga kryeqyteti. Një njësi e rojës bregdetare iu afrua mjetit lundrues për ta identifikuar, por sipas versionit zyrtar kuban, nga motoskafi ka pasur të shtëna me armë zjarri, duke plagosur komandantin e anijes kubane. Pas kësaj, forcat kubane janë kundërpërgjigjur me zjarr.
Si pasojë e përplasjes së armatosur, katër persona që ndodheshin në motoskaf humbën jetën, ndërsa gjashtë të tjerë mbetën të plagosur dhe u arrestuan. Autoritetet deklaruan se të dhjetë personat në bord ishin shtetas kubanë me banim në Shtetet e Bashkuara. Një prej viktimave është identifikuar si Michel Ortega Casanova, ndërsa tre të tjerë janë ende në proces identifikimi.
Sipas faqes zyrtare qeveritare kubane, në bord janë gjetur armë automatike, pistoleta, eksplozivë artizanalë, jelekë antiplumb, dylbi dhe uniforma kamuflazhi. Havana pretendon se grupi po përgatitej për një veprim të armatosur në territorin kuban.
Qeveria kubane theksoi se veprimi i rojës bregdetare ishte në mbrojtje të sovranitetit dhe ujërave territoriale të vendit. Autoritetet shtuan se Kuba mbetet e vendosur për të parandaluar çdo hyrje të paligjshme dhe çdo kërcënim të sigurisë kombëtare.
Ngjarja ndodh në një moment tensionesh të vazhdueshme mes Kubës dhe Shteteve të Bashkuara. Marrëdhëniet mes dy vendeve kanë qenë historikisht të vështira, të shoqëruara me embargo ekonomike dhe përplasje politike. Ky incident mund të ndikojë më tej në klimën diplomatike mes dy shteteve, ndërsa pritet reagimi zyrtar i Uashingtonit dhe zhvillimi i hetimeve për zbardhjen e plotë të rrethanave.
Autoritetet kubane kanë nisur hetimet, ndërsa personat e plagosur po marrin trajtim mjekësor. Situata mbetet e tensionuar.