Ka përfunduar me sukses operacioni i kërkim-shpëtimit për nxjerrjen nga uji të 22-vjeçarit, i cili ishte raportuar i humbur në ujërat e lumit Osum.
Sipas njoftimit zyrtar të Ministrisë së Mbrojtjes, i riu ndodhet në gjendje të mirë shëndetësore, është i vetëdijshëm dhe aktualisht po merr trajtim mjekësor.
Operacioni u koordinua nga Agjencia Kombëtare e Mbrojtjes Civile (AKMC), në mbështetje të strukturave vendore dhe u realizua falë bashkëpunimit të ngushtë mes alpinistëve, vullnetarëve, forcave speciale RENEA dhe Forcat e Armatosura.
Ndërkohë, vijojnë kërkimet për një tjetër person të humbur. Vlen të theksojmë se pikërisht për gjetjen e këtij të fundit, 22 vjeçari u angazhua vullnetarisht me forcat RENEA, por u bllokua në kanionet e Osumit që prej mesditës së djeshme.
Kujtojmë se që prej orës 11:30 të shtunën, specialistët e Xhenios ishin në aksion për zhbllokimin e aksit rrugor Uji i Zi-Tozhar, në territorin e bashkisë Poliçan. Paralelisht me ta, Forcat e Armatosura zhvilluan kërkimet për 42 vjeçarin e zhdukur.
Dyshohet se ai i dha fund jetës mbrëmjen e 20 shkurtit duke u vetëhedhur në lumë, në vendin e quajtur “Ura e Blezënkës”, në afërsi të kanioneve të Osumit në Skrapar.
