Sot, më 30 janar 2026, Këshilli i Lartë Gjyqësor (KLGJ) vendosi që të mos shqyrtojë drejtpërdrejt relacionin e Këshillit të Karrierës mbi verifikimin e mandatit të gjyqtares Irena Gjoka, duke e kaluar çështjen në Inspektoratin e Lartë të Drejtësisë për hetim të mëtejshëm.
Gjyqtarja Irena Gjoka ka qenë në qendër të vëmendjes së opinionit publik pas dërgimit të dokumentacionit nga Prokuroria pranë KLGJ, lidhur me dënimin e saj penal në Greqi. Prokuroria ka kryer hetime të thelluara dhe ka konstatuar se dokumenti i dënimit është i saktë dhe i vlefshëm për t’u shqyrtuar në kuadër të procedurës së verifikimit të statusit të gjyqtares në Shqipëri.
Kreu i Partisë Demokratike Sali Berisha në fjalimet e tij publike përpara SPAK ka sulmuar shpesh herë gjyqtaren Gjoka, duke thënë se ajo ka qenë e dënuar në Greqi dhe vijon që të jetë në detyrë.
“Ky është shteti i Irena Gjokës me 5 mbiemra. Është dënuar me vendim të formës së prerë dhe vazhdon që të jetë gjykatëse. Nuk mund të jetë gjykatëse, në momentin që është dënuar dhe nuk e ka deklaruar as në formularin e dekriminalizimit”, ishin akuzat e kreut demokrat.
Akuzat e Berishës ndaj Gjokës vinin, për shkak se ajo ishte gjyqtare në hetimet ndaj kryedemokratit në kuadër të dosjes “Partizani”. Dënimi i Gjokës u vërtetua edhe nga Prokuroria, ndërsa ajo ka thënë se nuk ka qenë në dijeni të dënimit.
