Dosja e Prokurorisë së Posaçme për aferën e tenderave në AKSHI zbardh një mekanizëm tronditës presioni kriminal dhe bashkëpunimi institucional, ku pengmarrja e një biznesmeni shfaqet si mjet për të manipuluar procedurat publike.
Në qendër të akuzave qëndron anëtari i Komisionit të Prokurimeve Publike (KPP), Kreshnik Ternova, i akuzuar drejtpërdrejt në SPAK nga biznesmeni Gerond Meçe.
Sipas dosjes hetimore, Meçe është marrë peng me urdhër të Ergys Agasit për një qëllim të vetëm: të tërhiqej nga ankimimet e tenderave ku fitues ishin shpallur kompanitë e lidhura me Ergys Agasin dhe Ermal Beqirin.
KPP në shërbim të skemës
Deklarimet e Gerond Meçes në SPAK hedhin dritë mbi një element kyç të skemës: pa një person brenda KPP-së, tërheqja dhe verifikimi në kohë reale i ankimimeve do të ishte i pamundur.
Emri i përmendur prej tij është ai i anëtarit të KPP Kreshnik Ternova, për të cilin hetimet ngrenë dyshime serioze për lidhje me biznesmenin Ermal Beqiri.
SPAK dokumenton se kërkesa për pezullimin e “njoftimit të tërheqjes” nga kompania ‘ABS’ është refuzuar nga KPP, një vendimmarrje që ka favorizuar drejtpërdrejt pengmarrësit dhe ka lënë të hapur dyshime të forta për ndërhyrje të paligjshme nga brenda institucionit.
Vendime të rrufeshme, tërheqje të pamundura
Në arsyetimin e dosjes, Prokuroria e Posaçme konstaton se KPP ka vepruar me një shpejtësi të pazakontë për të pranuar ankimimet e kompanisë së Meçes, ndërkohë që, vetëm një ditë më pas, kërkesat për tërheqje nga vetë drejtuesit e kompanisë janë refuzuar me argumentin se ankimimet “tashmë ishin bërë”.
“Nga kjo veprimtari rezulton bindshëm se edhe KPP ka nxituar të pranojë ankimimet e OE ‘ABS’, të cilat i janë marrë forcërisht, çka tregon koordinim të drejtpërdrejtë me veprimet e grupit të strukturuar kriminal”, thuhet shprehimisht në dosjen e SPAK.
Prokuroria thekson se KPP ka marrë në konsideratë vetëm tërheqjen e njërit operator ekonomik, duke injoruar faktin se në procedurë ishte përfshirë edhe një kompani tjetër si BOE. Kjo bie në kundërshtim flagrant me marrëveshjen e bashkëpunimit mes operatorëve, e cila ndalonte tërheqjen individuale pa pëlqimin e palës tjetër.
Njoftime në kohë reale gjatë pengmarrjes
Një nga elementët më rëndues të dosjes është fakti se, ndërsa Gerond Meçe mbahej peng, autorët komunikonin vazhdimisht për tërheqjen nga ankimimet. Vetëm pak minuta më pas, ata merrnin konfirmim se veprimet ishin reflektuar në sistemin e KPP-së.
Për SPAK, kjo provon se pengmarrësit kishin akses ose bashkëpunim të drejtpërdrejtë me zyrtarë të Komisionit të Prokurimeve Publike, të cilët monitoronin dhe raportonin në kohë reale çdo lëvizje.
Akuza e drejtpërdrejtë e biznesmenit në SPAK shkon pa ekuivok: përgjegjësia bie mbi anëtarin e KPP-së, Kreshnik Ternova.
