Partia Demokratike organizoi më 22 dhjetor një protestë kombëtare, që sipas Berishës do të rrëzonte qeverinë e Edi Ramës. Për Report Tv ne studion e “Sot, Live në Shqipëri”, analisti Indrit Vokshi ka komentuar ngjarjet e fundit politike, kryesisht lidhur me opozitën duke thënë se PD ka nevojë për reformim dhe për një figurë të re drejtuese.
Vokshi preku dhe skandalet e fundit që kanë prekur eksponentë të lartë të qeverisë si Belinda Balluku apo dhe institucione. Ai vijon të thotë se një qeveri nuk rrëzohet më protesta për aq kohë sa qytetarët nuk kanë një alternativë zëvendësuese.
“Nuk mund të thonë gjë tjetër, është retorikë normale kjo “nuk do të ndalemi me protestat”. Jemi përballë skandaleve të mëdha të qeverisë që rrezikojnë sigurinë e shtetit shqiptar. Njerëzit thonë: si ka mundësi që me gjithë këto skandale nuk rrëzohet qeveria? Nuk rrëzohet qeveria me pesë protesta. Ka nevojë edhe për një ofertë që duhet ta pranojnë qytetarët për të zëvendësuar Edi Ramën”, tha Vokshi.
Indrit Vokshi krahasoi PD-së e Berishës me atë të Lulzim Bashës, për të cilin tha se në zgjedhjet e 2021, pavarësisht se humbi, Basha përsëri nuk i dha PS-së shumicën e cilësuar. Vokshi thotë se sa herë Berisha është në zgjedhje, Partia Demokratike shënon humbje të thella duke i dhënë Ramës të gjithë shumicën e nevojshme.
“Programi i qeverisë lidhet me besimin e njerëzve. Mosbesimi ndaj programit politik është i lartë. Në vitin 2013 Rama mori 84 mandate. Me këto mandate shkatërroi shtetin dhe sistemin politik, bëri ligjin për administratën, e ndau Shqipërinë si deshi vetë. Nëse Berisha do të kishte marrë 64 mandate, Rama nuk do të kishte mundësi të bënte vetë reformën territoriale vetëm në vitin 2013. Sa herë vjen Berisha, humb thellë dhe i jep Ramës 85 mandate. Lulzim Basha nuk ia dha Ramës shumicën e cilësuar në zgjedhje, sepse mori 64 mandate. Këta dalin më keq se ai Luli i keq që e shajnë”, tha analisti.
Ai komentoi gjithashtu dhe Ervin Salianjin me takimet që po organizon me demokratët nëpër rrethe. Vokshi tha se është qesharake kur PD thotë se ai është vetëpërjashtuar. Indrit Vokshi u shpreh se nuk do ishte aspak e keqe që Salianji të garonte përballë Berishës. Në skenarin më të keq tha analisti, Salianji do të humbasë dhe do të futet në grupin e tradhtarëve që janë larguar më parë nga Partia Demokratike.
“PD ka njerëz dhe duhet të reformohet dhe duhet ta provojë njëherë në jetë të kandidojë pa Berishën, se ndoshta i del më mirë. Nuk ka mjet më të fortë shantazhi se vota dhe pëlqyeshmëria e qytetarëve. Vota e tmerron një qeveri; qeveria nuk trembet se i hedhin shishe me benzinë.
Rasti i Salianjit po jepet si rast studimor për të treguar edhe njëherë mungesën e seriozitetit në atë parti. E bën qesharake t’i thuash tjetrit “je vetëpërjashtuar”. Çdo debat normal i bën mirë PD-së. PD nuk është parti anonime, por ka njerëz kudo nëpër Shqipëri. Në partitë klasike, njerëzit që japin një alternativë të vjetër e kurorëzojnë me një kandidim. Kandidimi nuk do të ishte gjë e keqe; në rastin më të mirë do të legjitimohej brenda PD-së, në rastin më të keq do të futej në grupin e Lulzim Bashës, Bamir Topit dhe gjithë tradhtarëve të tjerë që janë larguar nga PD”, tha Indrit Vokshi.