Rreth 8,000 oficerë nga 14 vende anëtare të NATO-s po marrin pjesë në stërvitjen shumëjavore “Quadriga 2025”, e cila po udhëhiqet nga ushtria gjermane dhe po zhvillohet në Detin Baltik, mes tensioneve me Rusinë për shkak të luftës në Ukrainë.
Bundeswehr-i konfirmoi se 40 anije, 20 avionë dhe mbi 1,800 automjete rrugore po marrin pjesë në stërvitjet “Quadriga”.
Udhëheqës ushtarakë nga Gjermania dhe ambasadorë nga vendet Baltike ishin mes atyre që u mblodhën në portin gjerman të Rostock-ut të enjten për të parë stërvitjet. Ata panë nisjen e një trageti të ngarkuar me automjete ushtarake, i cili kishte destinacion qytetin Klaipeda në Lituani dhe që shoqërohej nga një korvetë, një helikopter dhe një anije çminuese, si dhe nga policia.
Në total, rreth 8,000 oficerë nga 14 vende po marrin pjesë në stërvitjet shumëjavore, përfshirë të gjitha vendet e NATO-s me dalje në Detin Baltik, si dhe anëtarë të tjerë të aleancës si Mbretëria e Bashkuar, Franca dhe Shtetet e Bashkuara.
Duke folur të enjten, Gjenerali Carsten Breuer, shefi i ushtrisë gjermane, tha: “Sot po shohim nga afër se çfarë do të thotë konkretisht kur Gjermania merr përgjegjësi ndërkombëtare dhe vepron si një qendër e besueshme furnizimi për NATO-n.”
“Pothuajse të gjitha rrugët e furnizimit drejt krahut lindor kalojnë nëpër Gjermani”, shtoi ai.
Më herët gjatë kësaj jave, Breuer tha se ushtria e tij ishte “vigjilente” ndërsa Rusia dhe Bjellorusia po përgatiten të fillojnë stërvitje të përbashkëta ushtarake, të quajtura Zapad (Perëndimi), në mesin e shtatorit. “Kërcënimi mbetet i pandryshuar, si në formën hibride ashtu edhe në atë konvencionale”, theksoi Breuer.
“Putini po na vëzhgon, dhe planet e tij shkojnë përtej Ukrainës. Si forca të armatosura, duhet të përgatitemi për këtë. Ne duam të krijojmë frenim, jo përshkallëzim”, theksoi Breuer.
Përballë kërcënimit që paraqet agresioni rus për sigurinë e Europës, Gjermania, ashtu si vende të tjera të NATO-s, po rrit shpenzimet ushtarake. Berlini shpreson që dhjetëra mijëra ushtarë të rinj t’i bashkohen Bundeswehr-it.
Si pjesë e këtyre përpjekjeve, kabineti gjerman miratoi në fund të gushtit një projektligj që synon forcimin e mbrojtjes së vendit, duke rritur numrin e trupave nga 182,000 në 260,000 deri në fillim të dekadës së ardhshme.