Banorët dhe politikanët e Minnesota-s në SHBA kanë protestuar ashpër pas vrasjes së një 37-vjeçari nga agjentët e emigracionit.
Menjëherë pas të shtënave, protestuesit u përplasën ashpër me forcat e sigurisë, të cilat shpërndanë turmat me tymuese dhe gaz lotsjellës.
Ngjarja ka nxitur gjithashtu tensione midis zyrtarëve shtetërorë dhe federalë, të cilët ishin në kundërshtim me administratën Trump për shkak të të shtënave me armë zjarri ndaj një shtetaseje tjetër amerikane, Renee Good, në fillim të këtij muaji.
Presidenti amerikan, Donald Trump, reagoi duke publikuar një foto të armës së viktimës, të cilën ai thotë se e kishte me leje, dhe akuzoi udhëheqësit e Minesotës për keqmenaxhim dhe nxitje të trazirave.
“Kjo është arma e personit të armatosur, e mbushur (me dy karikatorë shtesë të plotë!), dhe gati për të qëlluar. Për çfarë bëhet fjalë? Ku është policia lokale? Pse nuk u lejua të mbronin oficerët e Imigracionit dhe Doganave? Kryetari i bashkisë dhe guvernatori i tërhoqën ata qëllimisht?”
Guvernatori i Minnesota, Tim Walz, i bëri thirrje Presidentit Donald Trump të tërheqë ICE-në nga Minesota, duke thënë se agjentët federalë po mbjellin kaos dhe dhunë.
“Ky pushtim federal i Minesotës ka kohë që nuk është më një çështje e zbatimit të ligjit për imigracionin. Është një fushatë brutaliteti e organizuar kundër popullit të shtetit tonë. Dhe sot, kjo fushatë mori një jetë tjetër. I kam parë videot nga disa këndvështrime dhe është e neveritshme.”
Departamenti i Sigurisë Kombëtare i SHBA-ve tha se agjenti e qëlloi 37-vjeçarin për vetëmbrojtje, ndërsa pamjet dhe dëshmitë nga personat pranë vendit të ngjarjes tregojnë të kundërtën.
Ky është rasti i dytë brenda këtij muaji kur agjentët federalë, të dërguar nga administrata për operacione kundër personave që ndodhen ilegalisht në SHBA, qëllojnë për vdekje protestues.
Viktima, Alex Pretti, ishte shtetas amerikan me profesion infermier, ndërsa më 7 janar agjentët qëlluan për vdekje një grua 37-vjeçare, gjithashtu shtetase amerikane.