Kryeministri Edi Rama ndodhet këtë të diel në Abu Dhabi. Me anë të një postimi në rrjetet sociale, Rama ka shprehur solidaritet të drejtpërdrejtë me Emiratet e Bashkuara Arabe dhe Presidentin Sheikh Mohammed Bin Zayed.
Ai thekson mbështetjen ndaj vendeve mike të Gjirit Arabik në një moment të vështirë, duke shprehur bindjen se ato do të dalin më të forta nga kjo situatë tensioni.
Kryeministri e cilëson konfliktin si një përballje ku vendet e rajonit janë bërë objekt i “hakmarrjes së verbër”, ndërsa nënvizon qëndrimin e Shqipërisë në krah të aleatëve të saj strategjikë.
“Abu Dabi, për të shprehur drejtëpërdrejtë solidaritetin vëllazëror me Emiratet e Bashkuara Arabe dhe mikun e shtrenjtë, Presidentin Sheikh Mohammed Bin Zayed, në këtë kohë të trazuar për vendet mike të Gjirit Arabik, të cilat jam i bindur se do të dalin më të forta se kurrë më parë nga sprova e një konflikti ku u bënë shënjestër e hakmarrjes së verbër të një shteti të mbetur në një qoshe të errët të histories”, shkruan Rama.
