Analisti Lorenc Vangjeli ka analizuar pasojat e djegies së mandateve të opozitës në vitin 2019, duke theksuar se ky veprim gabim i opozitës e garantoi fitoren e Edi Ramës jo vetëm për mandatin e tretë, por edhe për mandatin e katërt.
Në emisionin “Trialog” në RTSH, Vangjeli theksoi se djegia e mandateve dhe bojkotimi i zgjedhjeve lokale nga opozita në 2019 ishte një “gabim kriminal” që tronditi sistemin politik shqiptar dhe e bëri të vështirë për opozitën të rikuperohej.
“Shqipëri vijon të jetë në një krizë të vazhdueshme zgjedhore, në kuptimin se humbësi nuk njeh rezultatin ndërkohë që fituesi ka vështirësi të përkohshme për të administruar fitoren. Shqipëria humbi një nga shanset periodike të saj për të zhvilluar zgjedhjet, që të ishin të pakontestuara nga askush. Hilja apo devijimi i zgjedhjeve në afatgjatë janë problematike dhe kam përshtypjen se të gjithë gabuam në 2019 dhe një pakicë dëshpëruese të zërave publik kur djegia e mandateve të opozitës në 2019 e konsideruan si një faturë të caktuar që i garantonte Ramës mandatin e 3-të, por në fakt i kanë garantuar edhe mandatin e 4-ët”, tha Vangjeli.
Ai e cilësoi këtë veprim si një “atentat kamikaz” që, edhe pse goditi opozitën, i dha mundësinë Ramës të ruante kontrollin dhe të konsolidojë pushtetin për më shumë kohë.
“Duket si e çuditshme por nëse rikthehemi edhe njëherë në kohë, një nga shkaqet themelore të opozitës edhe në këtë zgjedhje është gafa kriminale e djegies së mandateve dhe bojkotit të zgjedhjeve lokale po në 2019. Ky është një atentat kamikaz në themel të sistemit që e ka tronditur gati gati të pakthyeshme për një kohë të caktuar vetë sistemin, por atentatorin e vrau. Nëse ne 2021 gara ishte shumë afër mes dy forcave politike, kësaj radhe as Sali Berisha nuk mendonte se partia e tij do të arrinte së paku të njëjtin rezultat ose një hendek minimal me PS. E gjithë loja zhvillohej jo te dilema kush do ishte fituese, por sa më shumë dol ishte diferenca. Gara bëhej vetëm për vendin e dytë”, tha Vangjeli.