Analisti Lorenc Vangjeli e ka cilësuar vitin 2025 si vitin e ndëshkimit, por jo të drejtësisë. Në emisionin “Trialog” në RTSH, ai komentoi arritjet e sistemit të drejtësisë, duke theksuar se pavarësisht zhvillimeve, vendi mbetet ende larg garantimit të drejtësisë së plotë.
“Është vit ndëshkimi, por ende jo vit drejtësie. Ka shumë akuza, fillimisht kanë qenë publike, politike, tani janë certifikuar edhe nga akuza publike si të tilla, por mbetet të verifikohen në gjykatë. Ajo që mund të thuhet padyshim është që pandëshkueshmëria është një mit që i përket së shkuarës, por dhënia e drejtësisë është ende larg”, tha ai.
Vangjeli nënvizoi se qytetari i zakonshëm shqiptar e ka edhe më të vështirë rrugën drejt drejtësisë, ndërsa për luftën kundër krimit të organizuar dhe korrupsionit ka rezultate të dukshme.
“Qytetari i zakonshëm shqiptar e ka edhe më të vështirë nganjëherë edhe më të pamundur rrugën drejt drejtësisë, pra garantimin e drejtësisë. Ndërkohë që për pjesë tjetër, luftën kundër krimit të organizuar dh e korrupsionit, ka rezultate domethënëse. Drejtësia është një aktor me të cilin po bëhen llogaritë në tavolinë. Më së paku në dy vitet e fundit, drejtësia është imponuar dhe ka arritur të garantojë bashkëqeverisje në distancë me Edi Ramën dhe bashkëqeverisje edhe me Sali Berishën. Në kuptimin që shumë vendime të Ramës dhe Berishën ndikoheshin në mënyrë të drejtpërdrejtë nga ky aktor i ri në fushë”, theksoi ai.
Analisti shtoi se procesi i reformës në drejtësi pritet të sjellë surpriza dhe sakrifica, të cilat shpesh i përjetojnë qytetarët shqiptarë përmes drejtësisë së vonuar apo të përçudnuar.
“Unë besoj që do të ketë shumë surpriza dhe sakrifica, për fat të keq, që bëjnë qytetarët shqiptarë që marrin drejtësi të vonuar apo të përçudnuar, por ndoshta ja vlen”, shtoi Vangjeli.