Presidenti i Shteteve të Bashkuara, Donald Trump, përsëriti kritikat ndaj kryeministrit britanik në largim, Keir Starmer, duke deklaruar se qytetarët britanikë nuk e miratuan qëndrimin e tij lidhur me luftën me Iranin. Duke folur në Shtëpinë e Bardhë, Trump shtoi me ironi se Starmeri “nuk ishte Winston Churchill”.
Komentet u bënë pas dorëheqjes së Starmerit nga drejtimi i Partisë Laburiste, pasi ai pranoi se kishte humbur besimin e një pjese të rëndësishme të grupit të tij parlamentar.
Trump deklaroi gjithashtu se Starmeri “i ka shkaktuar dëm të madh vetes” përmes politikave të tij në fushën e emigracionit dhe energjisë. Megjithatë, ai e përshkroi kryeministrin britanik si “një njeri shumë të mirë” dhe “disi mikun tim”.
Marrëdhëniet mes dy liderëve u përkeqësuan ndjeshëm pas shpërthimit të konfliktit me Iranin. Qeveria britanike kishte refuzuar fillimisht t’u lejonte Shteteve të Bashkuara përdorimin e bazave ushtarake britanike për operacione bombardimi kundër Iranit, megjithëse më vonë dha një autorizim të kufizuar për misione me karakter mbrojtës.
Përplasjet diplomatike u thelluan gjatë krizës në Ngushticën e Hormuzit, ndërsa Uashingtoni kritikoi publikisht qëndrimin e Mbretërisë së Bashkuar dhe të disa aleatëve të tjerë.
Në të njëjtën kohë, Shtëpia e Bardhë hodhi poshtë propozimet e paraqitura nga Mbretëria e Bashkuar dhe Franca për krijimin e një misioni shumëkombësh për mbrojtjen e lundrimit detar pas përfundimit të luftimeve.
“Nuk ishin aty kur na duheshin”
Gjatë një deklarate në Zyrën Ovale, Trump tha: “doja të shihja nëse do të vinin vërtet të na ndihmonin. Kërkuam mbështetjen e tyre dhe ata nuk ishin aty për ne.”
Ai shtoi se mungesa e mbështetjes nga Londra nuk u prit mirë nga opinioni publik britanik. “Starmeri nuk ishte aty dhe, e dini çfarë? Populli britanik nuk e pa me sy të mirë këtë”, tha ai.
Sipas Trumpit, kryeministri britanik kishte lënë të kuptohej se Mbretëria e Bashkuar do të mbështeste SHBA-në vetëm pasi lufta të ishte fituar. “Nuk kishim nevojë për ndihmë pasi do ta kishim fituar luftën”, tha Trump, përpara se të shtonte me ironi: “nuk kishim të bënim me Winston Churchill-in.”
