Autoritetet gjermane kanë reaguar ashpër pas një vale trazirash dhe plaçkitjesh që përfshinë qendrën financiare të Frankfurtit gjatë fundjavës, ku dhjetëra mijëra persona morën pjesë në protestat mbarëkombëtare të organizuara nga lëvizja “Gen Z regelt” (“Gen Z merr kontrollin”).
Manifestimet, të cilat synonin të ngrinin zërin kundër rritjes së kostove të jetesës, shkurtimeve në arsim dhe shërbime sociale, degjeneruan në përleshje të dhunshme me forcat e rendit.
Gjatë përplasjeve në rrugët e Frankfurtit, protestues me kapuçë shkaktuan dëme të shumta materiale.
“Protestuesit dëmtuan 17 dyqane, nga të cilat pesë u plaçkitën”—përfshirë edhe një subjekt që tregtonte armë zjarri—bëri të ditur Ministri i Brendshëm i shtetit të Hessen-it, Roman Poseck.
Sipas të dhënave zyrtare, në terren u angazhuan rreth 1,300 trupa policore. Përleshjet lanë më shumë se 100 efektivë të plagosur nga goditjet me gurë, shishe dhe bomba molotov, ndërsa policia arrestoi 54 persona të moshës nga 13 deri në 29 vjeç.
“Jam i shokuar nga ajo që kam parë. Gjërat nuk mund të vazhdojnë kështu”, deklaroi Poseck gjatë një konference për shtyp.
Deklaratat e ministrave dhe akuzat për përfshirje të radikalëve
Përshkallëzimi i dhunës solli reagime të menjëhershme edhe nga ekzekutivi federal. Ministri i Brendshëm gjerman, Alexander Dobrindt, dënoi sulmet ndaj shërbimeve të emergjencës dhe siguroi se autorët do të përballen me pasojat ligjore.
“Pres që të ketë dënime të rënda. Ne nuk jemi të përgatitur të pranojmë, aspak, që incidente dhe trazira të tilla të ndodhin këtu”, tha ai.
Zyrtarët e lartë sqaruan se shumica e të arrestuarve ishin shtetas gjermanë, mirëpo policia vlerëson se mes 1,000 deri në 1,500 nxitës të dhunës kishin prejardhje emigrantësh apo vepronin në bashkëpunim me grupe të ekstremit të majtë.
Për të parandaluar përhapjen e mëtejshme të trazirave—të ngjashme me ato të regjistruara në Francë javët e kaluara—autoritetet gjermane njoftuan se kanë shtrënguar kontrollet kufitare për të shmangur hyrjen e elementëve ekstremistë nga jashtë vendit.