I shpallur në kërkim ndërkombëtar për trafikimin e 50 kilogramëve kokainë nga Belgjika, është arrestuar në kryeqytetin italian, Romë, Markelian Hoti, vëllai i deputetes së Partisë Demokratike, Elda Hoti.
27-vjeçari u vu në pranga këtë të mërkurë në zonën Ponte di Nona, në periferinë lindore të Romës, ku ishte strehuar në një hotel bashkë me të dashurën. Sipas mediave italiane, ai qëndronte i paregjistruar në sistemin e hotelit, çka e kishte bërë praktikisht të padukshëm për autoritetet.
Markelian Hoti ishte shpallur në kërkim nga autoritetet belge pas sekuestrimit të 50 kilogramëve kokainë në portin e Antëerpit. Droga dyshohet se kishte mbërritur nga vendet e Amerikës së Jugut dhe më pas transportohej me makina luksoze drejt Dubait. Hetimet dyshojnë se ai kishte rol kyç në një organizatë kriminale të përfshirë në trafikun ndërkombëtar të narkotikëve.
Arrestimi u realizua pas një operacioni të koordinuar mes Interpol dhe skuadrës antidrogë në Romë. Pas verifikimit të identitetit, 27-vjeçari u dërgua në burg, ku do të qëndrojë në pritje të procedurave të ekstradimit drejt Belgjikës.
Urdhri i arrestit ishte lëshuar në muajin janar, ndërsa ndaj tij rëndon akuza për “organizatë kriminale për trafik narkotikësh”, vepër penale që parashikon deri në 15 vite burg.
Rekorde kriminale në familje
Markelian Hoti rezulton i arrestuar edhe në vitin 2023 në Tiranë për armëmbajtje pa leje.
Ndërkohë, edhe bashkëshorti i deputetes Elda Hoti ka pasur probleme me drejtësinë, pasi më herët atij i janë gjetur 50 kilogramë marijuanë. Po ashtu, babai i deputetes raportohet se ka ndryshuar emrin në të kaluarën dhe rezulton me precedentë penalë.
Çështja pritet të ketë zhvillime të tjera, ndërsa autoritetet belge dhe italiane vijojnë hetimet për zbardhjen e plotë të rrjetit të trafikut ndërkombëtar të kokainës.
