Tirana do të mirëpresë nga sot deri të mërkurën Samitin IV të Diasporës Shqiptare, një ngjarje e rëndësishme që synon të forcojë lidhjet mes shqiptarëve.
Ky organizim tre-ditor është caktuar të mbahet në datat 13-14-15 prill.
Slogani zyrtar i samitit që do të mbahet në Pallatin e Kongreseve është: “Përmes rrënjëve lartësohemi”.
Ministria për Evropën dhe Punët e Jashtme ka publikuar një ditë më parë edhe agjendën e samitit, që përfshin panele të shumta diskutimi mbi tematika të ndryshme, por edhe shumë të ftuar, ku veçohen personalitete të rëndësishme të Shqipërisë dhe të diasporës.
Diskutimet do të fokusohen në çështje kyçe si roli i diasporës në demokraci dhe përfaqësim, ndikimi në zhvillimin ekonomik dhe inovacion, si dhe kontributi në fusha si shëndetësia, arsimi dhe kërkimi shkencor.
Ndër pjesëmarrësit përmendet kryeparlamentarja e Kosovës, Albulena Haxhiu; kryeparlamentari i Maqedonisë së Veriut, Afrim Gashi; zëvendëskryeministri i Malit të Zi, Nik Gjeloshaj; ish-kryeministri i Malit të Zi, Dritan Abazoviç; zëvendëskryeministri i Kosovës, Glauk Konjufca.