Një nga institucionet më të kontestuara të administratës shqiptare duket se ka hyrë në një nga periudhat më të vështira të ekzistencës së tij. Agjencia Shtetërore e Kadastrës është vënë në qendër të një operacioni të gjerë të SPAK-ut, ku nën hetim kanë përfunduar drejtues dhe zyrtarë në disa qytete të vendit, mes dyshimeve për një skemë të organizuar korrupsioni që përfshin tjetërsime pronash, legalizime të paligjshme dhe bashkëpunim me grupe kriminale.
Në fokus të hetimeve ndodhet edhe drejtoresha e përgjithshme e ASHK-së, Lorena Goxhobelli, së bashku me disa prej bashkëpunëtorëve të saj në nivele drejtuese. Sipas raportimeve, prokurorët po hetojnë një rrjet të dyshuar zyrtarësh që, përmes vendimmarrjeve administrative dhe manipulimit të dokumentacionit, mund të kenë favorizuar regjistrimin e pronave në kundërshtim me ligjin.
Operacioni ka nisur të japë rezultatet e para. SPAK ka vendosur sekuestro mbi disa sipërfaqe toke në zonën e Livadhit në Himarë, ndërsa burime pranë hetimit bëjnë me dije se aksione të tjera pritet të zhvillohen në javët në vijim. Në vëmendje të prokurorëve është edhe Drejtoria e Kadastrës Tiranë Rurale 1, ku po verifikohen dyshime për abuzime me regjistrimin dhe tjetërsimin e pronave.
Sipas informacioneve të publikuara, një denoncim i bërë muaj më parë pretendon se prona të qytetarëve janë kaluar në emër të personave të tjerë në bashkëpunim me zyrtarë të kadastrës. Pretendohet se materiali është dorëzuar edhe pranë SPAK-ut dhe po verifikohet në kuadër të hetimeve.
Raportet hetimore nxjerrin në pah se vatrat kryesore të dyshuara të korrupsionit ndodhen në Tiranë, Durrës, Elbasan dhe Vlorë. Veçanërisht në Durrës dhe zonën e Gjirit të Lalzit po hetohen raste të dyshuara të legalizimeve të paligjshme dhe tjetërsimit të pronave, ndërsa në Elbasan verifikimet përfshijnë ryshfetin, manipulimin e dosjeve dhe përdorimin e strukturave të Kadastrës për interesa të grupeve kriminale.
Sipas burimeve, hetuesit dyshojnë se ndikimi i grupeve kriminale nuk është kufizuar më vetëm në korruptimin e punonjësve të veçantë, por ka depërtuar në nivele drejtuese të institucionit, duke krijuar një mekanizëm që mund të ketë lehtësuar pastrimin e parave përmes pasurive të paluajtshme dhe sektorit të ndërtimit.
Shifrat e SPAK-ut flasin për një fenomen me përmasa të mëdha. Vetëm gjatë vitit 2025 janë sekuestruar pasuri të paluajtshme me vlerë mbi 11 milionë euro, të cilat dyshohet se ishin regjistruar përmes dokumenteve të falsifikuara me përfshirjen e zyrtarëve të ASHK-së.
Ndërkohë, sipas burimeve, Lorena Goxhobelli i është nënshtruar kontrolleve nga organet e drejtësisë ditët e fundit dhe ndaj saj priten zhvillime të mëtejshme procedurale. Në të njëjtën kohë, institucioni që ajo drejton përballet me një krizë të thellë funksionimi.
Mbi 36 mijë dosje legalizimi vijojnë të mbeten pezull, ndërsa mijëra metra katrorë prona, kryesisht në zonat bregdetare, janë vendosur nën sekuestro preventive pasi dyshohet se ishin në proces legalizimi në kundërshtim me ligjin. /JOQ
