Një 53-vjeçar nga Kosova ka rënë në prangat e policisë së Portit të Durrësit, pasi tentoi të fuste kontrabandë në Shqipëri 49 celularë (iPhone), që i kishte fshehur në kabinën e kamionit. Në operacionin “Smartphone” u vu në pranga 53-vjeçari Sahit Idrizi.
“Në vijim të kontrolleve intensive në hyrje/dalje të territorit, shërbimet e Policisë Kufitare të Portit të Durrësit, mbi bazën e analizës së riskut dhe kundër paligjshmërive në kufi, finalizuan operacionin policor “Smartphone”, si rezultat i të cilit u godit një rast në fushën e kontrabandës së mallrave. Për këtë rast u arrestua në flagrancë shtetasi kosovar S. I., 53 vjeç, banues në Kosovë. Në Port Durrës, në hyrje, shërbimet e Policisë Kufitare, gjatë kontrollit në automjetin që drejtonte shtetasi S. I, gjetën të fshehura në kabinë, dhjetra celularë (iPhone), për të cilët ky shtetas nuk kishte fatura blerjeje”.
Policia sekuestroi celularët në cilësinë e provës materiale, bashkë me kamionin dhe 2 celularë në pronësi të tij.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.