Kryeministri britanik Rishi Sunak po përballet me kritika të ashpra në vendin e tij, lidhur me praninë në takimin e Cop28 në Dubai. Sunak mori pjesë në Konferencën e Kombeve të Bashkuara për Ndryshimet Klimatike në vitin 2023, ashtu si edhe mbreti Charles.
Siç shkruan Daily Mail, “kryeministri hodhi poshtë paralajmërimet se reputacioni i Britanisë së Madhe është dëmtuar nga rishikimi i strategjisë së qeverisë Net Zero, pasi tha se vendi mund të shkojë lart”, ndërsa më pas mediat britanike komentuan vendosjen e Rishi Sunak në foton standarde të atyre që morën pjesë në Konferencë. Ai qëndronte në rreshtin e fundit, pas kryeministrit të Shqipërisë, Edi Rama.
Si kreu i shtetit, Mbreti Charles ishte në rreshtin e parë të grupit pranë presidentit francez Emmanuel Macron. Monarku do të mbajë një fjalim kryesor mbi mjedisin, një çështje për të cilën ai ka bërë fushatë për dekada. Komisionerja e BE-së Ursula von der Leyen dhe presidenti i Këshillit Evropian Charles Michel u vendosën më shumë në mes.
Sunak u pyet në samit se si do t’u përgjigjej atyre që e akuzonin se nuk ishte serioz në lidhje me veprimet klimatike. “Ne kemi një histori të jashtëzakonshme në dekarbonizimin në Mbretërinë e Bashkuar, më shpejt se çdo ekonomi tjetër e madhe. Ne duhet të jemi vërtet krenarë për këtë,” tha kryeministri britanik.
Sunak shtoi: “Ne po udhëheqim botën në industri të reja si era në det të hapur. Ne po e mbrojmë natyrën në shtëpi, kështu që kemi një histori të mrekullueshme për të treguar”. Ai tha se vendet e tjera i janë ‘thellësisht mirënjohëse’ mbështetjes që ata po marrin nga Britania, për të tejkaluar tranzicionin./Liberale.al
