Të paktën gjashtë palestinezë, përfshirë dy fëmijë, janë vrarë nga sulmet izraelite në Rripin e Gazës, sipas autoriteteve shëndetësore në enklavën ku vijon një armëpushim i brishtë.
Sipas ministrisë së brendshme të kontrolluar nga Hamas, katër persona humbën jetën në një sulm që goditi një automjet policie në Qytetin e Gazës. Mes viktimave ishte edhe një djalë trevjeçar, Yahya al-Malahi, si dhe një efektiv policie. Të paktën nëntë kalimtarë u plagosën, disa prej tyre në gjendje të rëndë.
Ndërkohë, në veri të Gazës, pranë Jabalia, 14-vjeçari Adam Ahmed Halaa u vra nga zjarri izraelit, sipas autoriteteve shëndetësore dhe familjarëve të tij.
Në spitalin Al Shifa, familjarë dhe të afërm u mblodhën për t’u dhënë lamtumirën viktimave. Babai i njërit prej fëmijëve, Muhlis al-Malahi, tha se po largoheshin nga një dasmë kur ndodhi sulmi. “Cili ishte krimi i tij? Ai duhej të vishte kostum sot, por tani është i mbështjellë me një mbulesë gjaku,” tha një i afërm i familjes.
Nga ana tjetër, Forcat Mbrojtëse Izraelite deklaruan se kishin vrarë një person të armatosur që iu afrua trupave të tyre në veri të enklavës.
Sipas të dhënave, më shumë se 750 palestinezë janë vrarë që nga hyrja në fuqi e armëpushimit mes Izraelit dhe Hamasit më 10 tetor 2025, ndërsa katër ushtarë izraelitë kanë humbur jetën në të njëjtën periudhë. Të dyja palët vazhdojnë të akuzojnë njëra-tjetrën për shkelje të marrëveshjes së armëpushimit.
